Riba diasabra a tuma luga e Vacunathon Youth Edition, un accion pa promove vacunacion entre hobennan di edad 12-17 aña. Esaki a tuma luga for di 9or di mainta na Centro Libertador Betico Croes, cu a keda habri te cu 4or di atardi. E Vacunathon aki no tabata exclusivo pa mucha, loke a nifica cu cualkier persona mayor di 12 aña por a presenta y ricibi vacuna contra SARS-CoV-2.

DVG a informa cu te cu 11:30 di mainta, tabatin 1,252 mucha vacuna, loke ta representa un grado di vacunacion di 13.4 porciento. Pa fin di e Vacunathon Edicion Hubenil, a logra vacuna un total di 1,781 persona di edad entre 12 pa 17 aña. Cu esaki a yega na un grado di vacunacion di 19.1 porciento entre e grupo di poblacion aki.

“Pa nos stroba e virus di sigui plama bao di e diferente gruponan di edad den nos comunidad, ta importante pa nos sigui vacuna mas hopi ciudadano posibel dentro di e diferente gruponan di edad”, DVG a conclui.

Actualisacion di casonan semanal
 Segun actualisacion semanal di e pandemia di Covid-19 na Aruba, di Departamento di Salubridad Publico DVG, datonan colecta durante siman di 2 pa 8 di juli ta indica cu a registra 27 caso positivo nobo. Di esakinan, 16 ta residente y 11 ta turista.

Ademas, DVG ta informa cu 19 persona a recupera di Covid-19, e malesa causa pa e virus SARS-CoV-2. Cu esaki, riba diabierna tabatin un total di 33 caso activo, di cual 17 ta residente y 16 ta turista.

For di dialuna siman pasa, Crisis Team a informa cu update di casonan positivo di Covid-19 ya no lo wordo duna den forma diario, sino cu tur diabierna lo duna un resumen di e casonan di siman den un comunicado. Pa e motibo aki ta duna un actualisacion semanal y den esaki no tin detaye di dia pa dia. Sinembargo, DVG a informa cu e averahe di casonan positivo pa dia ta 4, loke ta representa un tasa di positividad diario di 6%. Di e 27 caso nobo registra siman pasa, solamente 4 tabata persona vacuna.

E cantidad di fayecido relaciona cu Covid-19 no a conoce aumento y ta keda na 107.

Di su banda, Hospital Dr. Horacio Oduber a informa cu riba piso general di Covid tin 5 persona interna, di cual 2 ta turista y tres ta local, mientras cu den Unidad di Cuido Intensivo ICU tin un persona local interna. Di e personanan local hospitalisa riba piso general di Covid, ningun tin historia di vacuna, segun Hospital a informa.