Guera di corta gasto medico… Pero ken sa kico…?

Manera conoci, gobierno, demisionario o dentro di poco uno nobo, ta bao presion pa cumpli cu e medida di corta considerablemente den e gastonan di cuido medico. Luna pasa tabatin entrega di e rapport di e comision cu a traha riba e recomendacionnan na gobierno kico pa haci. Na e momento aki publico en general ta na altura solamente di e frasenan general expresa durante entrega di e rapport, loke den e fase aki por comprende. Gobierno, y AZV, ta desea di tin nan tempo pa por evalua tranquilamente kico lo ta e proximo pasonan. Por a ripara cu Hulanda tambe ta tuma e asunto na serio, tumando nota di expresion di secretario di estado Knops durante su bishita unda el a enfatiza tambe cu e compromiso di 60 miyon florin di reduccion di gasto ta keda, y cu ta na Aruba pa dicidi con ta yega na e austerisacion aki.

Aunke no tin tanto conoci oficialmente di kico exactamente ta warda nos, por ripara e promer reaccionnan for di sector medico, unda por ehemplo e asociacion di medico di cas ta expresa nan preocupacion pa e situacion den nan parti di e sector, unda proximamente tin sigur cinco medico ta bandona servicio, sin cu tin un claridad riba nan reemplazo. Esaki di biaha a percura pa un avalancha di reaccion di diferente banda. Nos por scucha o lesa e diferente puntonan di vista, pero e problema ta keda cu, si bo no tin e plannan concreto bo dilanti, bo ta haya e sensacion di ta papia den bashi. No cu bo ta carece di conocimento general di e materia, pero nos ta bay pone opinion tocante e medidanan un banda, pa pasa pa mira e asunto manera e consumidor ta mir’e.

Pa cuminza, esaki: si ta papia di mantene, o hasta mehora servicio, y corta gasto, mester cuminza pa evalua ki papel un docter di cas ta hunga awendia den e proceso di cuido medico. No ta trata di evalua medico na nivel individual, pasobra pa esey simplemente nos no tin informacion ni tampoco ta nos tarea. Pero ban evalua con un pacient comun y coriente ta experimenta e cuido cu e por haya. Entre otro nos ta bin topa cu e problema cu docter di cas ta sobreocupa, segun e cifranan nan tin centenares di pacient mas cu un medico na Hulanda, por ehemplo. Esey ta haci cu haya un cita a corto plazo den hopi caso, no tur, ta casi imposible. E falta di disponibilidad di docter, no su disposicion, ta haci cu tin un exceso di pacient cu ta bay rumbo pa Hospital, un centro medico caro cu mester limita e yegada di pacient cu no mester a yega eynan na promer lugar. Esaki ta algo conoci pa hopi aña, pero no a haya un solucion nunca y no lo haya tampoco, pasobra no ta traha riba aumenta capacidad y por lo tanto disponibilidad di medico di cas. Loke ta funciona como agravante ta cu medico di cas tin e tendencia di ta un servicio cu ta solamente disponible ‘parttime’, atardi y anochi, y sigur marduga mester acudi na e unico servicio disponible, cu ta Hospital.

En vista cu no ta yega na soluciona e contradiccion aki, ta necesario enfrenta tur esnan envolvi cu e siguiente pregunta: cuanto tempo mas ta keda haci mesun cos, sperando resultado diferente? Y mas grave ainda ta cu nos ta ripara si cu a ‘inverti’ den otro tipo di servicio di cual nos ta puntra nos mes si tabata necesario. Por ehemplo: cerca hopi docter di cas awendia bo ta haya e servicio ‘den cas’ di tuma sanger, ya e pacient no mester bay cu su formulario bao di su braza pa un laboratorio pa laga tuma e muestra. Esaki ta parce hopi amable y servicial, pero tabata asina urgente pa haci esaki? Casi ningun hende ta yega na despacho di un docter na pia, y bien por subi den su vehiculo y bay na e sucursal di laboratorio ey cerca o cerca di su cas. Pero, ta nos finalmente ta paga e tipo di infrastructura aki, di cual nos no ta convenci di su necesidad. E ta aumenta servicio, pero dentro di e servicio ‘parttime’ di e docter di cas y por lo tanto no ta yuda den resolve e bottleneck di falta di docter di cas.

Awor, di e poco informacion cu a filtra di posible recomendacionnan nos a comprende cu gobierno ta contemplando un proyecto cu varios ‘medico bao di un dak’. Un tipo di trece servicio medico hunto cu ta conoci caba na otro pais. Problema ta keda cu nos no tin e informacion di con ta bay organisa trabao den un centro asina, di tal manera cu e ta contribui na resolve e problema di disponibilidad di docter di cas atardi y anochi, pa por ta un alivio pa e servicio di hospital. Nos por imagina si cu lo tin resistencia di docternan di cas cu ta prefera di keda riba nan mes y no ta aprecia e modelo di organisa cuido aki. En todo caso, mientras cu ta hibando un guera den prensa pero sin bin dilanti bisa pueblo kico ta e proposito, atrobe e famoso ‘transparencia’ ta molestia aki, nos no ta scoge banda, sin sa debidamente kico ta kico.