Tekashi69 ta haya demanda den su contra pa motibo di difamacion y daño di reputacion

(TMZ) – Tekashi69 ta daña reputacion, segun un artista di tatuahe den un demanda haci alegando cu e rapper a tuma su nomber y a difama su persona bisando cu e ta un adicto di heroina.

E artista di tatuahe Takashi Matsuba, a presenta un demanda na New York alegando cu su reputacion ta den peliger pa via di Tekashi69. Segun documentonan obteni pa TMZ, Matsuba ta declara cu 6ix9ine “a crea confusion y un percepcion publico falso” cu ta duna na compronde cu Matsuba ta asocia cu Tekashi69. Cual Matsuba ta nenga rotundamente.

Matsuba ta conta cu e confusion ta facil di wak, e rapper su nomber artistico ta sumamente serca di Matsuba su prome nomber, cu diferencia di solamente 1 letter, Takashi pa Tekashi.

Den e documental di Tekashi69 titula “69: The Saga of Danny Hernandez” tin un escena unda cu e nomber di e artista di tatuahe “TAKASHI MATSUBA” ta aparece riba e pantaya. Matsuba ta alega cu por te hasta tende e director bisa “Peter su compañero cu e ta biba cu su persona, un artista di tatuahe Hapones yama Takashi lo inspira Danny su personahe artistico, Tekashi69.”

Segun Matsuba, por tende Tekashi declara den e documental “tin un artista di tatuahe yama Takashi di nos bario. Y e tabata un adicto di heroina. E tabata usa e droga pa por crea su arte. E tabata haci esaki pa por drenta den su propio mundo chikito y pa asina por ta su mes. Di eynan mi a saca e nomber Tekashi, y esey ta ken ami ta.”

Matsuba ta revela cu e informacion aki ta falso y difamatorio pa motibo cu su persona nunca no a usa heroina.

E frasenan di Tekashi69 segun e artista di tatuahe ta dañino na su profesion pa motibo cu e arte di tatua hende ta rekeri di hangua, y heroina ta conecta den mente di hende cu hanguanan hipodermico.

E artista di tatuahe a exigi productornan modifica e documental pa kita su imagen, su nomber y cualkier parti cu tin di haber cu su persona for di e documental lansa riba Hulu, cual segun Matsuba nan a nenga di haci, y pa e motibo aki a dicidi di presenta un demanda pa e dañonan causa.

Te ainda ni Showtime ni Tekashi a comenta tocante e demanda.