(HaitiLibre/DiarioLibre) – Autoridadnan di Haiti a aresta 15 Colombiano y 2 Mericano di origen Haitiano pa nan supuesto participacion den e asesinato di presidente Jovenel Moïse, segun fuentenan oficial diahuebs.
E comando cu a efectua e asalto mortal tabata consisti di 26 Colombiano y e dos Mericanonan, segun hefe di Polis Nacional Leon Charles, den rueda di prensa hunto cu promer ministro Claude Joseph, unda a presenta e personanan deteni.
Charles a bisa cu 8 ”mercenario” Colombiano ta fugitivo ainda y ta busca nan “activamente”, mientras cu tres otro a muri den tiroteo cu forzanan di seguridad. Anteriormente a anuncia cuatro morto, pero a cambia e cifra sin splicacion.
Esposa di Moise no a fayece y lo ta na Merca pa tratamento, mientras cu Claude a limita su mes na bisa cu “e ta na un lugar sigur”.
Gobierno di Colombia a haya peticion di Haiti pa informacion tocante seis di e sospechosonan, incluyendo dos di esnan mata, y a determina cu nan ta ex-militar. Colombia a ofrece su cooperacion den e asunto na presidente interino Claude.
Militarnan Colombiano cu a haya training Mericano ta recluta repetidamente pa companianan priva di seguridad den varios zona di conflicto mundial, pa nan experiencia den e guera di varios decada contra guerrilla izquierdista na nan pais y cartelnan di droga poderoso.
Segun varios fuente e atacantenan a presenta nan mes como efectivo di e agencia Mericano contra droga, DEA. Ta circula tambe imagennan riba internet di dos persona stranhero cu tabata scondi pero a keda descubri pa e poblacion, cu a gara nan y hiba nan pa polis mientras tabata maltrata nan.
