Recuperacion economico ta…Hustifica tur cos…?

Negociacion pa un gobierno nobo ta avanzando rapidamente y esey ta bon, pasobra ta hopi trabao tin cu ta wardando riba e equipo nobo pa tuma rienda di e pais. Si pronto por tin un gobierno pa tuma rienda den man, nos por tin e perspectiva tambe di probecha di forma maximo di e recuperacion economico, pa sikiera bolbe yega unda nos tabata.

Pero, gobernacion ta un proceso continuo y ta haci cu, a pesar cu nos ta cerca di e momento di tin un gabinete nobo instala, tin asunto cu na e momento aki ta molestia, y ta exigi atencion di esun cu t’ey. Un di nan ta cu, manera turismo a bolbe lanta cabez, e fenomeno di molester di UTV, cu tur e boroto, stof y destruccion di naturaleza cu e actividad aki ta trece cune. Y mescos cu algun tempo pasa, den e periodo pre-Covid, awor atrobe nos ta cay back den e mesun discusion, sin cu ta mira algo di actividad di parti di e ministerionan cu mester atende e asunto aki. Talvez e mandatarionan concerni tin nan propio interpretacion di kico ta un ‘ministro demisionario’. Den nos concepto, y nos ta kere cu ley ta apoya nos opinion, hustamente e problemanan aki cu tabat’ey caba ta e tereno cu e ministro demisionario mester cubri. Pero mirando e hecho cu destruccion di naturaleza ta sigui sin tregua, y e actitud conspirativo di e dos mandatraionan hustamente den e asunto aki, lo ta necesario pa tackle e asunto aki inmediatamente cu e gobierno nobo, sea ken sea e mandatario nobo concerni.

Di igual manera por referi tambe na e problema cu a surgi despues di e maneho destructivo di e ministronan di husticia y di sector primario pa promove piscamento cu harpun, bao di e pretexto cu tabatin Arubiano hambriente cu a pesar di Fase y bijstand lo mester ta subi lama diariamente pa haci uso di nan licencia pa pone pan, o mejor dicho, pisca riba mesa familiar. A resulta cu e ta un grupo hopi chikito cu ta haci uso di e posibilidad, pero di otro banda no tin control efectivo riba e areanan marino, cu consecuencia cu no tin ni idea mes con grandi e daño ta na pesca di especienan protegi. Ademas di e piscadornan individual, e mandatarionan cu ta tumando despedida den e dianan aki a otorga tambe posibilidad di pesca na companianan cu ta explota boto di pesca como anfitrion di turista, cu pa un suma considerable por haya e placer, como un di e poco destinacionnan den nos region, di bay tira pisca cu harpun, otro menaza grandi pa nos fauna marino, sin cu tin e debido control riba esaki. Tur e advertencianan a ser haci y duna di antemano, pero ta parce, den ambos caso describi aki riba, cu poder economico bruto ta gana semper.

Y nos sa cu tin esnan entre nos cu lo bisa: “Pero ta di economia nos ta biba, no di biento…” Esey ta berdad, pero e economia ey mester t’ey mañan tambe. No ta cuestion di ruina tur cos den un par di aña y despues e mesun companianan cu a probecha di e añanan bon, lo mester busca otro cos di haci pasobra nan no por sigui. Esey en corto ta loke kier bisa cu e termino ‘economia sostenible’. Na Papiamento plano: “Laga algo pa mañan tambe”. Y ora esnan ciega pa gana di gana placa a corto plazo y ta nenga di wak mas leu, ta pesey un pais tin gobernacion…, si e ta dispuesto di haci su trabao. Y kico e trabao ey ta? Regula y canaliza economia. Nos no mester un gobierno cu ta stroba economia cu regla innecesario, pero un cu ta pone orden unda mester. Lamentablemente nos ta bibando den un pais unda nos tin e contradiccion peculiar di gobernacion cu ta stroba economia cu tur tipo di proceso administrativo cu ta tarda ‘un aña y un dia’, aunke den e contexto aki e expresion di antaño ey ta cay corto pasobra varios aña pa yega na cierto permisonan no ta excepcion, y esaki ta obstaculiza operacion mas eficiente di negoshi. Di otro banda, gobierno(nan) ta ‘look the other way’ ora ta trata di actividad economico cu pa nan operacion destructivo ta menaza e propio fundamento di nan operacion a largo plazo. Den e mesun categoria aki ta cay tambe e maneho cu a hiba semper cu e refineria, cu e resultado cu despues di casi 100 aña di su presencia ainda nos no tin ni sombra di legislacion riba tereno ambiental pa e sector specifico ey. No ta nada straño anto cu un representante di Quanten LLC, e operador fantasma cu gobierno demisionario a scoge como mihor opcion pa habri e refineria, su boca a slip den entrevista cu Bon Dia Aruba y el a comenta cu na Merca operacion di refineria a bira sumamente costoso pa via di e reglanan ambiental, cu otro palabra, Aruba ‘danki Dios’ no tin tur e reglanan manera EPA na Merca ta pone.

Na esnan cu ta kere cu ta mihor pa duna tur tipo di negoshi man liber pa haci loke nan kier, nos ta bisa cu Aruba ta recupera suficientemente robusto, pa pone regla drechi y alavez sigui progresa. No mester scoge ciegamente pa beneficio economico sin control.