(AP) – Varios estado ta tumando accion contra di Google como parti di un movemente ofensivo cu ta escalando ariba diferente companianan Big Tech.

E biaha aki, abogadonan general di 36 diferente estado y e districto di Columbia a haci un demanda contra di Google Pay Store, unda cu tur cliente por descarga aplicacionnan traha pa e programacion Android cu ta duna funcion y bida na mayoria di e telefonnan mobil mundialmente.

E keho di 144 pagina entrega riba diaranson den Northen California su corte federal ta representa e cuarto demanda contra monopolio cu a ser poni contra Google di parti di agencia gubernamental rond di Merca desde october aña pasa.

E demanda aki ta bin despues di un algun proposicion di leynan den Congreso cu ta traha pa kibra of baha e poder cu Google, Facebook, Apple y Amazon a logra obtene. E cuatro companianan aki tin imperio cu un balor di triyon dollar cu ta alimenta pa e popularidad inmenso di e servicionan di cual hendenan ta depende aworaki.

Hopi di e demandanan mas reciente ta alegacionnan similar na esunnan di e trahado di wega Epic Games contra di Google y Apple, ken tin un aplicacion separa exclusivamente pa Iphones, den casonan treci dilanti den augustus di aña pasa.

Mescos cu Epic, e demanda di e estadonan ta alega cu Google su declaracionnan cu e programacion di Android ta un sistema cu ta opera habri cu ta brinda e clientenan mas opcion ta un estafa.

E keho ta declara cu Google a lansa varios tactica pa pone bareranan contra e competencia pa asina sigura cu nan lo ta distribuidor di mas cu 90% di e aplicacionnan riba e aparatonan cu ta opera cu Android, un porcentahe di mercado cu segun e abogadonan general ta representa un monopolio illegal. Riba di esaki, e demanda ta alega cu Google ta abusando di su poder y ta generando biyones di dollar den ganashi usando clientenan cu lo caba na paga prijsnan mas halto pa asina subsidia e comisionnan y e trahadonan di e aplicacionnan cu tin menos placa y menos incentiva pa innova.

“Google su monopolio ta un menasa na e mercado” abogado general di Utah Sean Reyes a declara, ken ta e persona lidiando cu e demanda conhuntamente cu su coleganan di New York, Tennessee y North Carolina. “Google Play no ta hungando na un manera husto. Google mester para responsabel pa e daño haci na e companianan chikito y e clientenan.”

Google no a responde inmediatamente na e demanda, pero e ta keda defende su postura cu e manera cu e ta maneha su Play store den su respuesta contra e demanda di Epic Games y den otro instancianan.

E compania The Mountain View, California tambe ta batayando contra dos otro demanda cu a ser haci contra su persona aña pasa, incluyendo un caso treci dilanti pa e departamento di husticia di Merca. E casonan aki ta enfoka riba e supuesto abuso di Google su sitio web dominante cu ta usa pa cualkier busqueda online y e red di anuncionan cibernetico y digital cu ta genera mas di 100 biyon dollar annualmente pa su mayor corporativo Alphabet Inc.

Den bista cu e critica a keda aumenta riba e aplicacionnan, ambos Apple y Google a cuminsa tuma medidanan di reconciliacion. Mas notabel, tur dos compania a baha nan comision na 15% cu e prome ganashi di 1 miyon dollar colecciona pa trahadonan di aplicacion, un reduccion cu a cubri mayoria di e aplicacionnan den tur dos tienda cibernetico.

Sinembargo, e medidanan aki no a baha e presion riba niun di e companianan di tecnologia grandi aki, ni tampoco esaki lo mester sosode segun Senador Amy Klobuchar, un democrata di Minnesota cu ta den cuerpo di un comite cu ta trata cu tur loke tin di haber cu casonan contra monopolio.

“Esaki ta un ehempel exacto di e tipo di aplicacion agresivo cu nos mester tin pa cu e casonan contra monopolio cu nos tin mester pa asina por mantene e poder di e companianan cibernetico grandi aki bao control, y asina por maneha Merca su problema cu monopolio.” Senador Klobuchar a comenta.

Pero e lucha contra e companianan grandi aki di tecnologia no lo ta uno facil. Apesar di tin e abilidad di por paga cantidadnan grandi di placa pa por mantene nan posicion, e companian aki tambe ta argumenta cu nan tin ley na nan banda. Facebook, por ehempel, a gana un victoria grandi siman pasa ora cu un hues a anula un demanda contra monopolio haci pa cu e compania di red social haci pa Federal Trade Commission y un coalicion di bienes pa motibo cu nan no a somete suficiente prueba pa comproba cu e alegacionnan di monopolio.