Ayera mainta Parlamento di Aruba number 11 a wordo huramenta cu 20 parlamentario y cu e presencia di su excelencia mr. Alfonso Boekhoudt Gobernador di Aruba, oranan despues a keda conoci cu Edgar Vrolijk a bira presidente y Ursell Arends vice-presidente di parlamento aki cu ta number 11.

Mervin Wyatt Ras presidente provisional di parlamento e dia di ayera a dirigi e sesion aki na unda el a expresa cu ayera tabata un dia importante pa e sistema democratico na unda tabata e dia cu representantenan di e organo di mas halto di pais Aruba a huramenta.

Den ocasion aki diferente politiconan a wordo huramenta pa prome biaha como por ehemplo, Arthur Vallejos ken a manifesta cu su prioridad semper ta pueblo na unda e ta sinti e honor di representa pueblo na un nivel di parlamento cu ta esun cu ta mas halto.

“Aworaki nos ta bay tin hopi challenge nos dilanti y ta bay tin momentonan na unda cu tin cu tuma decisionnan hopi serio y hopi fuerte pa Aruba, pero ta cosnan cu mi ta kere cu nos mester tuma na cuenta responsablemente y semper cu pueblo prome”, el a sigura.

Manera ta conoci, Vallejo ta specialisa den area di salud na unda el a menciona cu el a lanta den area di salubridad y cu esaki pa su persona ta un prioridad hopi importante.

Gerlien Croes di partido AVP cu tambe ta forma parti di e grupo di parlamentarionan nobo a bisa cu el a bin trahando pa esaki desde 2017, “mi ta kere cu Aruba ta warda tambe pa mas hoben y mas cara nobo den parlamento como nan representante”, tambe el a sigura cu e ta cla pa e reto aki.

Algun dianan pasa, gabinete di Gobernador a informa cu un di e parlamentarionan cu a wordo nombra di partido AVP, Oslyn Benito Sevinger cu na e momentonan aki ta deteni den KIA no lo asisti na e huramentacion y cu esey lo tuma luga na otro momento, Croes a trece dilanti cu ley ta prescribi cu tin un temporada fiha pa un persona huramenta, segun el a declara y cu e no ta limita na cierto cantidad di dianan of simannan.

“Ta bon pa comparti cu na e momento aki mes awe nos a huramenta mientras cu e kiesverordening ta duna e espacio di casi cinco pa seis siman pa un proceso normal, den caso aki mi ta kere cu a traha e landsbesluit pa yama e eleccion y no a tuma cuenta cu e articulo 10 di staatsregeling cu ta cu e kiesverordening pa e motibo ey e huramentacion a bay den un forma hopi apresura y en todo caso ley ta prescribi y ta duna gobernador espacio pa tuma e decision aki y mi ta kere cu nos tin cu respeta tambe”, Croes a señala.

Di loke ta trata e prioridadnan, el a expresa cu e situacion cu Hulanda ta hopi preocupante, nan a haya recientemente un advies rapport pa lo cual ta e parti di salubridad y nan ta wak cu e medidanan ta bay ta hopi drastico y cu ta bay cay riba lomba di pueblo, manera el a indica.

“Mi ta sinti cu no a traha pa tin un miho espacio di dialogo of tin un plan pa negocia, laga nos wak con e desaroyo ta bay ta cu e landspakkete y nos tin cu analisa con e doorlichting ta tuma luga na Aruba pa lo cual ta bin bishita na instancianan y scolnan, decisionnan mester wordo tuma hopi responsabel”, el a finalisa.

Pa Ryçon Santos do Nascimento a comenta cu e ta contento di por representa e pueblo di Aruba y cu awor e trabou ta cuminsa, “mi ta espera cu mi por duna mi contribucion na debate publico, yuda hisa e calidad di politica na Aruba, yuda hisa e calidad di decisionnan den gobernacion y den legislacion”, el a afirma.

Di mesun manera, el a splica cu tin hopi problemanan social cu mester di atencion special pa esey y tambe educacion, ademas el a afirma cu di tur problema cu loke e kier logra ta solucion cu ta duradero y e ta kere cu un di e cosnan cu ta hopi importante ta pa cuminsa inverti mas den studiantenan, pa motibo cu nan rendimento ta hopi grandi, “si nos ta educa nos yiunan bon y si nos yuda nos studiantenan bay dilanti, nos no ta yuda a nan so sino tambe e Aruba di mañan” do Nascimento a declara.

Di su parti, Ursell Arends cu a wordo eligi como vice-presidente di Parlamento a indica cu pa su persona ayera tabata un dia hopi emocional y esey ta un responsabilidad hopi grandi cu nan mester asumi como sirbidonan di comunidad y sirbidonan di pueblo, “nos ta cla pa cuminsa traha caba, nos sa cu tin retonan grandi nos dilanti como pais y esey ta sigur ta cosnan cu nos tin cu bay atende akiden como parlamentario”, el a bisa.

Aquannette Gunn di partido MAS a expresa cu esaki ta un orguyo pa nan por representa pueblo “pasobra pueblo mester un bos pa asina trece tur su preocupacion dilanti y awe mi a huramenta pa asina mi por ta un digno representante di pueblo, pa bo trece cambionan necesario na bienestar general di tur e hende cu ta biba riba pais Aruba”.

Di loke ta trata e incidente cu a presenta den seno di partido MAS cu dos candidato, Gunn a menciona cu ora el a bin dilanti pa splica kico tabata e situacion esey a bira pio ora cu Conseho Electoral a manda e nombernan di ken ta esunnan cu lo conforma parlamento, “cu tin problema den nos seno, no tin problema, nos ta conta cu 7 candidato riba lista y no tin problema algun”, Gunn a sigura.

Asina mes, Marisol Lopez Tromp tambe a trece dilanti cu e ta gradici pa e apoyo cu partido MAS a ricibi, el a afirma cu “no tabatin turbulencia den partido, tabatin turbulencia riba Facebook” cu tabata mas bien relata na un discusion cu lo a bin riba e red social aki di loke ta trata e protocol interno cu nan tin den partido caminda cu asina cu e votonan individual a keda presenta y asina cu a sali un lista di ken Conseho Electoral a bisa cu ta e parlamentarionan cu tin cu drenta parlamento segun ley, “esey tabata un discusion y exigencia prematuro pasobra aworaki den parlamento ta un fase tin di loke ta informacion y e ta un fase hopi importante cu mester trankilidad”, Lopez Tromp a finalisa.

Tambe, prome minister demisionario cu tambe a wordo huramenta como parlamentario Evelyn Wever-Croes a sigura cu e biaha aki ta su di cuater biaha cu e ta huramenta y cu e ta keda como un momento unico, “ta keda un momento hopi particular, specialmente pa parlamentarionan nobo”.

Di loke ta trata e formacion di gobierno el a afirma cu esey ta bayendo bon na unda el a reuni cu informador nan caba y cu manera a keda conoci, ayera den oranan di anochi MEP y RAIZ a firma un declaracion di boluntad (‘bereidwilligheidsverklaring’) den cual nan a declara cu nan ta dispuesto pa conhuntamente forma un gobierno di coalicion pa e periodo 2021 – 2025.