Ayera den oranan di merdia Parlamento a vota pa nan presidente y vicepresidente nobo. E resultado ta mustra e experiencia cu pueblo tabatin semper cu e organo aki, unda e partner mas grandi di e coalicion a bay cu e puesto di presidente y esun di vicepresidente ta pa e otro partner.
Mainta durante e ceremonia di huramentacion, un parlamentario di oposicion, drs. Mervin Wyatt Ras a guia e ceremonia den Parlamento y tambe e prome parti di e reunion pa scoge presidente y vicepresidente. Esaki pa motibo cu no tin un coalicion ainda, e miembro di mas aña den Parlamento ta esun cu mester a guia esaki.
Durante e reunion pa e votacion, por a nota si cu drs. Marisol Lopez Tromp ta esun cu a presidi e comision pa presidi e votacion. El a wordo compaña pa mr. Gerlien Croes y mr. Evelyn Wever Croes.
E prome votacion pa presidente tabata esun di mas emocion, unda e dos candidatonan tabata Edgar Vrolijk y Marisol Lopez Tromp. Dado momento nan tabata bay pareu cu otro y tabata en espera di kico Raiz lo a bay vota, pa mira si el a uni su mes na e bloke di partidonan chikito of a scoge pa e partido cu a gana eleccion.
Na final, Edgar Vrolijk a haya 11 voto, probablemente cu e dosnan di Raiz.
Pa e puesto di vicepresidente, e votacion tabata entre Ursell Arends y dos otro candidato di “oposicion” y na final tabata Ursell Arends.
E di dos opcion pa presidente tabata Hendrik Tevreden y e di dos opcion pa vicepresidente tabata Geofrey Wever. E nombernan aki ta bay pa Gobierno cu lo mester ratifica e resultado di e votacion.
Contrario pa por ocupa un puesto di minister, esunnan cu ta bira Parlamentario no ta pasa den screening. Esaki ta algo cu algun politico a pidi pa trece un cambio den dje pero no a resulta te ainda.
E persona cu ta ocupa e puesto di presidente mester sa cu esaki ta un posicion importante. E lo mester pone partido un banda, y maneha e maximo organo di representante di pueblo den forma neutral. E lo mester mira den un direccion so, di kico ta miho pa pueblo. Dicidi pa yama reunionnan den un termino normal.
E presidente no por participa activamente, hibando palabra of forma parti di discusion di temanan trata den Parlamento. Si e kier participa activamente den un reunion, e lo mester laga e vicepresidente guia e reunion.
Juan Ady Thijsen tabata presidente di Parlamento e ultimo ocho añanan. Si den e acuerdo di gobernacion entre MEP y Raiz, e partido geel haya 6 minister, Thijsen como number 13 lo drenta Parlamento.
E dos personanan cu a keda cu e puesto di vicepresidente ta di e partido Raiz. Si nan dicidi di acepta puesto di Minister, lo mester bini un votacion pa e vicepresidencia. Sin embargo informacionnan persistente ta mustra cu e dos candidatonan di Raiz ta prefera di keda den Parlamento y pone dos vak minister.
