Den un rueda di prensa teni na restaurant El Faro Blanco diahuebs anochi partidonan MEP y RAIZ a firma un acuerdo di intencion di forma un gobierno di coalicion, cu lo conta cu sosten di e 9 parlamentarion di MEP y dos di RAIZ.
Durante su discurso sra. Evelyn Wever-Croes a bisa cu a firma cerca informadornan un acuerdo di formacion, ya cu e partidonan tin suficiente similaridad pa goberna Aruba den e periodo di gobernacion aki. Ta trata di convenio cu lo firma, cu cual ta bay traha riba negociacion pa yega na formacion di un gobierno conhunto.
Den inicio di su discurso, Ursell Arends a enfatiza cu e dos partidonan RAIZ y MEP tin varios meta comun riba cual ta bay traha pa Aruba. Desde inicio ta tuma na cuenta e metanan stabilidad, integridad y paz. El a añadi cu ta un honor pa firma un declaracion di intencion na e Faro eytras cu ta un simbolo di forza; azota pa biento y solo pa mas di 100 aña y ta fuerte y stabil ainda. Tambe el a bisa cu eleccion a pasa y ta tempo pa pone bandera di Aruba mas halto cu e demas banderanan y logra un gobierno stabil pa e proximo cuatro añanan den un rumbo nobo.
Wever-Croes maner na mas ocasion a referi tambe na e tema di integridad, unda el a haci e comparacion cu e Faro, cu tin un luz “cu ta draai rond, bo no sa ki ora e ta yega. Bo mester ta vigilante hasta si ningun hende ta wak”.
Evelyn Wever-Croes a referi na e punto di yega na un acuerdo den e proximo tempo riba puntonan crucial. Esakinan tin hopi relacion cu e acuerdo cera cu Hulanda. Esaki segun e mandatario demisionario ta crucial pa e proximo gobierno den tur aspecto, entre otro di recuperacion economico, finanzas publico stabiel, reforma di aparato publico pa ta mas eficaz y eficiente, sin lubida aspecto social manera e cuido pa esnan vulnerable, entre otro mucha y hoben.
E acuerdo firma ta solamente un acuerdo di intencion; no tin un programa di gobierno cla ainda, den e proximo dianan lo bay traha riba esaki den negociacion entre e dos partidonan. Ambos partido ta convenci di “por yega na e mihor gobierno cu por ofrece Aruba awor aki,” segun palabra di e actual Promer Ministro demisionario.
E acuerdo entre e dos partidonan ta duna e apoyo minimo na un gobierno. A comenta hopi den ultimo tempo tocante e necesidad di un base mas amplio posible, en vista di e desafionan cu cualkier gobierno lo enfrenta durante e periodo di gobernacion nobo aki. Sin embargo, e partidonan ta convenci cu nan por ofrece e stabilidad necesario pa enfrenta e retonan nan dilanti.
Di e varios preguntanan di prensa, Wever-Croes a toca entre otro e tema di cambio di LMA, algo cu ta un punto den e Landspakket caba. Segun Wever-Croes por traha cune, pero tin algun punto cu a haya recomendacion pa cambia. Tambe el a anuncia cu lo sinta cu e sindicatonan tocante e propuestanan pa haci e aparato mas eficiente, haciendo eco na e yamado di e sindicatonan pa ta parti di e proceso pa yega na e reforma programa.
