Porco sushi ta busca muraya limpi pa frega su lomba riba dje!

Despues cu comunidad Arubano a ser sacudi na momento cu pa prome biaha den Reino Hulandes un politico corupto cera den KIA, esta Benny Sevinger a ser  postula riba e lista di AVP y awo cu e ta na punto pa keda huramenta como parlamentario di pais Aruba, e makinaria di propaganda di AVP a start pa trata di mancha e memoria y imagen di nos Libertador Betico Croes y su yiu Glenbert Croes y cu e solo proposito pa trata di tapa e berguensa cu AVP a hinca nos pais aden.

Betico nunca condena pa corupcion

Den nan desesperacion y sinberguenseria politico AVP a cuminsa lansa e mentira flagrante cu nos Libertador Betico Croes tambe a yega di bay sinta algun dia den prison y esaki pa motibo di supuesto corupcion cu e lo a comete.

Na prome luga partido MEP ta condena e expresion baho aki haci contra Betico Croes kende a sacrifica su bida y di su famia pa logra e Status Aparte pa nos pais y cu awe nos tur ta disfruta di dje.

Na di dos lugar, hamas Betico Croes a ser condena pa corupcion y ladronicia di placa y tereno di pueblo manera si ta e caso di Benny Sevinger y pa cual te ainda e ta deteni den KIA y kende cu su actonan coruptivo a pone un mancha scur riba henter Reino Hulandes.

Hecho ta cu na 1978 un revolver defecto a ser poni den e auto di Betico Croes ora cu su auto a ser hiba pa laba na prison. Betico nunca tabatin un arma den su poder y no tabatin necesidad di esaki tampoco ya cu su unico arma tabata su pueblo cu a apoy’e masalmente den su lucha pa libertad di nos pueblo. Pa e echo di un arma poni intencionalmente den su auto, Betico a pasa 7 dia den prison victima di un inhusticia sin precedente den historia politico di Aruba. E dia ey un multitud di fiel siguidornan a acompaña Betico Croes na pia ora cu el a bay sinta su castigo den prison. Betico a demostra cu hasta sacrificio di libertad personal tabata parti di e lucha.

Partido MEP ta haci un apelacion na AVP pa stop cu nan atakenan baho contra nos Libertador y pa laga Betico Croes sigui sosega na paz!

Glenbert nunca condena pa corupcion

Den e racha di mentira y odio di partido AVP contra famia Croes y MEP, un otro acusacion falso ta cu sr. Glenbert Croes den pasado tambe a ser sentencia den Corte pa pago di un suma cuantioso na pais Aruba. Pero den nan mezquinidad y odio contra tur loke ta concerni e famia di Betico Croes, AVP no a splica cu e suma cu sr. Glenbert Croes mester a paga tabata pa e indexering di trahadornan di WEB. Di bon curason sr. Glenbert Croes a paga e suma aki na e trahadornan di WEB y su persona no a coy y no haya ningun florin for di e suma aki!! Finalmente Glenbert Croes como un bon Arubiano honesto, decente y responsabel a cumpli cu e sentencia di Corte y den transcurso di añanan a paga e suma aki bek na pais Aruba. Pues no tabatin net nada di ladronicia y corupcion den e caso aki!

Cinco cargo serio contra Benny Sevinger

Echo ta cu e caso di Glenbert Croes ta diferencia di dia y anochi cu e caso Avestruz di Benny Sevinger caminda Benny Sevinger a haci su mes culpabel di falsificacion di documentonan, estafa, aceptacion di soborno, mal uzo di su funcion y labamento di placa. Tambe pa iregularidadnan relaciona cu otorgamento di un cantidad di terenonan comercial y pa cual sumanan di placa a core na miyones di florin. No ta pornada cu henter su bureau y amigonan fiel – den total 12 avestruz sospechoso – a ser deteni pa husticia y tur a sinta nan dianan den KIA, sperando nan caso wordo trata den Corte di Husticia.

Cu esaki tambe partido MEP ta desbarata tur e mentira y sushedadnan cu partido AVP a lansa den e ultimo dianan aki contra nos Libertador Betico Croes y tambe contra Glenbert Croes. Ta increibel con te ainda e ex ministro y parlamentario Benny Sevinger ta ser carga den teblachi di oro pa AVP y cu esaki ta sigui pone cara di nos pais na berguensa internacionalmente. Pero cu e nomber di Aruba ta wordo susha no ta importa AVP ya cu nan ta sigui completamente e expresion di nan detenido Benny Sevinger: We don’t give a damn!