(AP/BBC) – Abogadonan di R. Kelly ta pidiendo hues pa pospone e huicio planea pa dia 9 di augustus tocante e trafico sexual den New York City, argumentando cu nan no tabatin suficiente tempo pa prepara pa motibo cu R. Kelly ta bao cuarentena mandatorio den prizon for di su transferencia di Chicago.

Den un carta di dialuna manda pa hues U.S District Judge Ann Donnely, e abogado Deveraux Cannick a skirbi cu Kelly su cuarentena di 14 dia cual ta caba riba diamars ta haci cu apesar di loke Cannick ta bisa ta un “esfuerso mesun fuerte cu hercules” pa por prepara pa e huicio despues di a ser contrata riba dia 21, no a logra.

Cannick a argumenta den e carta cu Kelly su abogadonan nobo no por a reuni den persona cu Kelly pa motibo di e cuarentena y cu si procede cu e huicio di e celebridad manera tin planea lo nifica cu su persona no lo ricibi representacion efectivo.

Kelly, ken su nomber legal ta Robert Sylvester Kelly, a ser poni den cuarentena na momento di su yegada na Metropolitan Detention Center den Brooklyn, riba dia 22 di juni di Chicago, unda cu e tabata deteni pa cargonan similar. Diamars lo marca e di 14 dia di Kelly su transferencia na Brooklyn.

“Robert ta ansioso pa su dia den huicio, pero no na costo di su derechonan humano.” Cannick a elabora, purbando di laga cla cu e peticion no ta un tactica pa atrasa e huicio.

Fiscalnan federal no a responde na Cannick su peticion, y a nenga di duna comentario. Donnelly te ainda tin cu duna un respuesta na e peticion.

Prizonnan federal ta poniendo prizoneronan nobo of transferi den cuarentena desde e comienso di e pandemia di COVID-19 como parti di e protocol pa preveni e plamamento di e virus.

Kelly, ken tin 54 aña di edad, ta ser acusa di ta e lider di un empresa cu ta consisti di su persona, su manager, su guardia y empleadonan cu a yuda su persona busca y contrata hende muhenan pa actonan sexual tanto pa R. Kelly como pa otro personanan, similar na prostitucion.

Tambe tin cargonan di asalto sexual, abuso di menor, tumamento di potretnan indecente di menor y obstruccion di husticia. Fiscalnan federal ta bisa cu e grupo tabata selecta victimanan na conciertonan y otro luganan publico y tabata gaña e victima nan pa despues aregla tur cos pa e victimanan por biaha y conoce R. Kelly, momento cu R. Kelly tabata probecha pa keda cu e victimanan y usa nan como empleado pa actonan sexual trahando na un manera similar di culto sexual, cual a ser reporta pa otro medionan di noticia anteriormente, causando cu hopi di e victimanan a bin dilanti y a papia tocante e abuso cu nan a experiencia cu R. Kelly.

Un di e victimanan Kitti Jones, a alega cu e artista a pone su eprsona pasa hamber, despues a forsa su persona tin relacion sexual cu un otro muhe, y a abusa di su persona fisicamente.

E cantante famoso, ken a yega di gana premionan Grammy ta nenga di a abusa di algun persona.

Cannick a comenta cu na momento cu R. Kelly su cuarentena caba, y e ta permiti pa e reuni cu su abogadonan, nan lo ta forsa di pleita pa un di e numbernan limita di conferencia na e prizon den Brooklyn. Si un camber di conferencia no ta disponibel, nan lo mester reuni na e mesanan normal den medio di tur e otro prizoneronan y abogadonan.