(AP) – Boet a cay pa companianan cibernetico grandi manera Alibaba y Tencent riba diaranson di reguladornan contra monopolio como parti di un politica pa por tin control mas fuerte ariba e industria cu ta desaroyando rapidamente.
Den 22 caso, companianan a ricibi un boet di 500,000 yuan cual ta mas o menos 75,000 dollar cada un pa accionnan cu ta inclui e acto di adkiri bienes den otro companianan cu lo aumenta nan poder den e mercado den un manera inapropia, e State Administration pa e regulacion di e mercado a anuncia. El a bisa cu violadornan ta inclui 6 compania bao di Alibaba Group, y 5 bao di Tencent Holding LTd. y 2 di Sunin.com, Ltd.
China su lidernan ta preocupa cu e poder dominante di e companianan cibernetico aki riba internet, cual ta expandiendo den financia, servicionan di salud y otro areanan sensitivo. E partido comunista cu actualmente ta den mando a bisa cu pa medio di eherce e politica y reglanan contra monopolio, specialmente den tecnologia ta e prioridad di e aña aki.
Den e boet mas grandi te actualidad, Alibaba a ricibi un boet di 18.3 biyon yuan cual ta mas o menos 2.8 biyon dollar den april, pa motibo di a purba presiona e competencia. Otro companianan tambe a ricibi boet of a ricibi sancion pa causa di a viola competencianan, proteccion di data, privacidad y hopi otro reglanan mas.
Riba diadomingo, e servicio di lift Didi Global Inc., cual tabatin su debut den e mercado di bienes na Merca, a ser ordena pa reguladornan pa revisa nan coleccion y maneho di informacion di nan cliente.
