Recuperacion ta bay haci dolor y un lider cu ta bisa lo contrario, no ta honesto cu Aruba. Asina Secretario di Estado Demisionario pa Asuntonan di Reino Raymond Knops a bisa ayera durante su ultimo conferencia di prensa den e capacidad ey. Knops tabata riba su ultimo bishita na Aruba como Secretario di Estado y banda di despedida, a continua e negociacionnan cu Aruba riba particularmente e proposicion di rijkswet di consenso riba COHO. “Nos a sigui cu e negociacionnan riba e rijkswet, awor cu tin e conseho di Raad van State. Nos no ta cla, pero mi ta convenci cu lo bin un acuerdo,” Raymond Knops a bisa.

E Secretario di Estado a felicita Prome Minister Evelyn Wever Croes pa e resultadonan di eleccion di Juni, agregando cu no ta facil pa keda cu confianza despues di tuma decisionnan duro pero necesario. E tabatin compliment pa e forma con Prome Minister Demisionario di Aruba a maneha e pandemia y tambe e crisis financiero y e decisionnan duro cu a tuma, pa entre otro cumpli cu e condicionnan stricto pa asina Hulanda por a brinda sosten di likides.

A papia riba temanan cu tabata riba mesa pa e ultimo tres aña y nuebe luna, segun Prome Minister Wever Croes. “Esakinan ta finanzas, recuperacion y palabracionnan den cuadro di e sosten di likides, e landspakket y e rijkswet.”

Cumpli cu condicion

Realidad ta cu Aruba mester di mas sosten di likides y si Aruba ta cumpli cu e condicionnan den landspakket, e pais ta bin na remarke pa e sosten aki. Esey ta nifica e colaboracion na nivel di hospital entre e paisnan autonomo den Reino y Islanan BES pa asina baha gasto di tur. E hospitalnan di Corsou y St. Maarten a laga sa cu Aruba no ta cooperando pa yega na un acuerdo di cooperacion. Knops a bisa cu e no por amplia riba e detaye aki ya cu ta un asunto cu ta resorta bou di Minister Hulandes pa Salud, esta Paul Blokhuis. Pero en general e por a bisa si cu cooperacion no ta un luho sino necesidad. “E crisis a mustra e necesidad pa coopera. E otro asunto cu ta hunga un papel pa por coopera ta cu e gastonan di cuido ta sigui subi. Banda di e peso di cuido pa hendenan cu ta biba mas largo, na Aruba tin hopi caso di locual ta yama malesa di rikesa, esta malesanan cardiovascular. No por keda sin actua riba esakinan, y e cortamento di gasto y haci e cuido pagabel ta forma parti di e landspakket. Semper lo por tin problema den ehecucion, pero cu mester coopera ta un hecho.”

Raymond Knops a bisa cu e ta convenci cu Aruba lo keda participa den e negociacion pa colaboracion. Y semper ta final di e periodo pa cual a duna sosten di likides ta evalua si Aruba a cumpli. Pues ta na final di e tres kwartaal lo wak si Aruba ta cumpli cu e condicion di colaboracion na nivel di hospital. Mesun cos ta conta cu e reduccion di 60 miyon florin pa aña di gasto di AZV. Aruba a pidi pa haci un investigacion riba con realisabel esaki ta, y Hulanda tabata dispuesto pa warda riba e resultado. Pero, e gastonan ta bayendo for di man y no tin e luho pa sinta warda. Ta decisionnan duro cu mester tuma, Knops a bisa.

LMA

Un di e decisionnan duro sigur ta e reduccion di costo di personal di Gobierno. CAft a bisa siman pasa cu pa 2022 Aruba mester tin un presupuesto balanza y e ta rekeri reduccion di gasto. Cambio di LMA mester haci posibel pa hisa eficiencia y baha gasto. Pero ni Secretario di Estado Knops ni Prome Minister Evelyn Wever Croes a bay den detaye, kico esaki realmente nifica. E carta cu a ricibi di sindicatonan pa participa den e negociacionnan pa e landspakket lo keda trata pa Prome Minister, pero el a bisa cu te na e momentonan aki no tin nada di negociacion sino cu mester warda e revision di henter e aparato tuma luga.

Relacion y gratitud

Raymond Knops a bisa cu si ta un cos cu el a siña den su periodo como Secretario di Estado ta cu relacionnan den Reino ta realmente “relacionnan y cu por confia otro, sa kico ta e intencionnan, y si ta traha na interes di e habitantenan ta crea coneccion.”

Knops a bishita Aruba Aloe ayera, un empresa bieu di Aruba, cu ta di un famia empresarial dedica cu ta ilustrativo pa e pasion di empresarionan di e isla. “Locual ta sosodiendo na Aruba ta dinamico, economia ta bolbiendo, pero nos no ta unda mester ta,” Knops a bisa. “Hulanda a yuda no solamente cu sosten di likides, pakete di cuminda, sosten medico durante COVID-19, cu a yuda fortifica e lazonan mas ainda, y cu a mustra cu den bon y mal tempo si por yuda otro, lo haci esaki tambe. Pa esey mi ta gradecido y mi ta contento cu unda cu mi bay (na Aruba) mi a haya palabranan di gratitud tambe.”

Di su banda, Prome Minister Wever Croes tambe a expresa gratitud pa e “bon cooperacion, ayudo y sosten cu a ricibi durante e periodo tras di lomba,” di parti di Secretario di Estado Raymond Knops.