Jeffrey Schuilenburg a entrega mas di 5.000 firma na gobernador cu e peticion di no laga Benny Sevinger huramenta como parlamentario

Ayera mainta dilanti di oficina di despacho di gobernador Alfonso Boekhoudt, Jeffrey Schuilenburg a haci entrega di mas di 5.000 firma cu a keda recolecta cu e peticion di no laga e ex-minister y awor futuro parlamentario Oslyn Benito Sevinger di partido AVP huramenta como miembro di Parlamento di Aruba e dia di mañan.

Schuilenburg a expresa cu fin di siman aki nan a recolecta mas di 5.200 firma for di diferente ciudadanonan rond di Aruba pa asina manera el a sigura “ e pueblo no ta acepta e tipo di bagamunderia aki, pasobra e no ta algo normal cu ta bay haya bo cu un persona cu ta deteni bay huramenta, e ora ey e pregunta ta kico ta e balor di keda huramenta y kico ta nifica”, el a declara.

Manera a keda conoci algun dianan pasa, e candidato Sevinger den ultimo eleccion di dia 25 di juni a saca su mes cu mas di 1.600 voto pa haya un luga na Parlamento di Aruba pero na e momentonan aki e ta deteni na KIA pa motibo cu ta e principal sospechoso den e Caso Avestruz.

Di mesun manera, pa e proceso pa huramentacion lo tuma luga Sevinger mester sali for di KIA, nombra y huramenta como parlamentario y bay back den prizon.

Pa cu esaki, Schuilenburg a bisa cu esaki “ta algo cu no ta klop, y esaki ta algo cu e pueblo a rechasa, cu tur respet pa señor Benny Sevinger su 1.600 voto pero mas di 5.000 firma ta duna un mensahe akinan”.

Tambe, el a sigura “e ley mester a keda cambia caba, fraccion di MEP a bin cu ley riba screening di parlamentarionan y el a keda rechasa completamente pa e fraccion di AVP y awe nos por wak e pakico el a wordo rechasa”.

El a bisa cu e no ta kere cu ta husto pa pueblo di Aruba pa pasa e “berguensa aki” y cu Sevinger mester keda cla cu su asuntonan legal y e ora ey e por bin back, na e momentonan aki el a anuncia cu nan ta boga pa no pasa den esaki pa motibo cu e mancha ey no lo wordo kita nunca mas y cu Mike Eman lider di partido AVP tin otro candidatonan riba lista “hendenan cu tin capacidad, hendenan cu tin un bon record, nombra un di nan, ponel’e y tanten cu señor Benny Sevinger ta regla su asuntonan pa cu husticia, pero awor akinan nos no ta bay tolera e tipo di cosnan aki”, Schuilenburg a sigura.

Manera el a trece dilanti, Parlamento di Aruba ta e bos di e pueblo y e mester ta e ehemplo pa tur ciudadano cu ta biba den e isla aki, Schuilenburg a finalisa.