Bon Dia Aruba tabatin un entrevista cu presidente di FTA Hubert Dirksz, e sindicato mas grandi den sector priva, cu miembro den diferente sector, pa scucha con nan ta mira e situacion economico di e momento aki. Durante e pandemia hopi miembro a pasa den duro y te ainda ta pasando den duro mirando cu ainda e situacion di pandemia di Covid-19 no a pasa den su totalidad.
Segun Dirksz sector di construccion ta bastante morto ainda. E companianan ta avisa cu nan ta mira un aña di retraso prome cu nan haya actividadnan grandi. Tin proyeccion pa traha 4 hotel pero esey no ta tuma lugar mesora. Sin embargo un di nan so a cuminsa cu e parti di fundeshi. E renobacionnan cu tin di diferente hotel cu en total lo bira un cantidad basta grandi di camber, loke FTA ta contra, pa bin cu cantidad di camber di hotel, pero banda di esaki ta trabaonan cu no lo tuma lugar pa awor.
Pa loke ta trata e refineria, FTA no tin nada na bista, hopi hende ta den espera di kico ta bay pasa. Sin embargo pa loke ta trata e hotelnan, por bisa cu debi cu e ocupacion di casi tur hotel ta casi 100%, aunke tin cu ta menos tambe, pero ta mira un demanda pa trahador actualmente y cu companianan no ta haya tur loke nan mester; esaki ta trece un poco di problema pa sector hotelero.
Tin algun trahador cu nan ta logra haya via uitzendbureau cu ta pone cu e trahadornan aki lo no keda pa tempo completo, debi cu no tin un seguridad con e situacion lo sigui. Segun presidente di FTA na mayoria di e compania of hotelnan tin protocol cu ta mara na CAO, pa reduci orario di trabao y corta beneficionan temporalmente. Na e momentonan aki FTA ta sintando na mesa atrobe cu e companianan pa firma acuerdonan nobo, caminda ta coregi of ta bay back sea na 100% of casi 100% pa loke ta e beneficionan cu tabatin y cu e aumentonan cu tabatin proyecta of acorda pa tuma lugar, ta tumando lugar na e momentonan aki.
Sinembargo na e momentonan aki tur e companianan ta bisa mesun cos, cu nan a sufri dañonan grandi durante e pandemia, unda cu mayoria di e companianan a cay den un buraco cu nan mester a cera.
Dirksz no ta perde speransa y ta negocia pa asina yega na un acuerdo, mirando cu na e mesun manera cu e compania ta bisa, e trahador tambe ta bisa cu nan tambe a bay atras pa hopi tempo unda cu a ricibi poco entrada. FTA ta keda negocia pa asina yega na un acuerdo caminda cu e trahador ta haya su recuperacion y e compania ta haya un break unda cu ta necesario pa e por cera e buraco cu a haya den e crisis.
Presidente di FTA ta contento cu e hotelnan ta bayendo bon, mientras cu di e casinonan no ta scucha mucho, debi cu FTA no tin hopi miembro mas den casino, unda FTA tabatin miembro e casino a cera y e otronan a haya doñonan nobo.
Pa loke ta trata comercio tin algun caminda ta bay bon y algun no, pero unda cu tin benta di cuminda ta canando bon. Esunnan cu tin benta di auto, libreria, etc., ta dificil debi cu ainda no a mira un recuperacion completo y ainda ta pasando momentonan dificil y te hasta cu posibilidad pa manda hende cas. Comercio ainda ta den dificultad.
Pa loke ta trata sector di banco ta biba e fenomeno di hala faha mara y ta hopi cauteloso y ta haci diferente reorganisacion, unda cu ta haci diferente cambio positivo pa e banconan mes pa asina baha gasto di banco. Pa loke ta trata fundacionnan, nan ta keda depende di subsidio di gobierno y esey tin varios aña caba cu ta bao presion y esunnan cu a entrega e 12.6 % ta pendiente, pero ta mustra te na e momentonan aki cu e lo keda pa un tempo un poco mas largo, unda cu tur fundacion ta bao di presion na e momentonan aki. Pa loke ta trata e companianan manera aeropuerto, AAA ta draai hopi mihor.
Fianlmente, riba pregunta di BDA con ta para cu tumamento na trabao, atrobe, di hende ilegal envez di tuma localnan, Dirksz ta bisa cu ta opta toch pa tuma ilegalnan, y cu esey no ta kita si no tin un bon inspeccion di Departamento di Labor y cu e boetnan mester duna. Segun presidente di Sindicato FTA e situacion aki ta keda tuma lugar tanten no actua debidamente.
