Banda di molester di candela y aire toxico; Habitantenan di Parkietenbos y becindario mester wanta holo stinki y musca

Musca y holo stinki, esaki banda di huma di dump. E situacion aki a pone activista Anouk Balentina bira sumamente emocional y sclama pa ayudo pa su yiunan cu ta keda sufri pa motibo di Dumb di Parkietenbos. “For di siman pasa a trece tur e ‘sludge’ for di e planta di purificacion di awa na Bubali, pa kima den e incinerador. Pero prome por kim’e, a plam’e pa lag’e seca y asina finalmente pon’e kima. Pero mientrastanto parha y un cantidad di musca ta riba e desperdicio humano aki y ta afecta henter e bario. Pa colmo, coriente a bay y nos na Parkietenbos, Cas di Paloma, Simeon Antonio y Bucutiweg no por a habri ni bentana pa motibo di e holo stinki y musca.”

Otro bisiña cu no kier a keda menciona na nomber a bisa mesun cos. Su cas tin screen tur caminda, cu a stroba e muscanan di drenta pero no por a haci nada contra e holo stinki.

E preocupacion ta e muscanan cu ta bay riba e sushi di hende y despues ta plama den e bario. Un otro bisiña a haya problema cu su cacho cu diripiente a bira malo y finalmente e veterinario a conclui cu e animal a keda infecta cu un bacteria.

E bario aki ta bou mas molester atrobe. E situacion aki ta inhumano. Mi tin mi trabou, pero mi mester gasta mi placa pa bay Corte, pasobra Gobierno no ta cumpli cu su deber. Mi yiunan ambos ta malo na cas y mester a perde tur actividad di cierre di aña escolar, pasobra ambos ta malo. Nan no tin bida di mucha mas,” Balentina a bisa na yoramento.

“Nos ta haya molester di sushi di hende cu no por hinca mesora den e incinerado, pasobra mester plam’e pa e seca y despues kim’e.”

Balentina, kende a nace na Cas di Paloma a bisa cu e ta un hende di e bario. El a nace y crece banda di dump, y a traha su cas na Bucutiweg pasobra Gobierno a priminti cu ta bay hala e dump. El a kere den e promesa ey. “No ta husto cu enbez mi uza mi energia, tuma mi tempo pa mi yiunan, mi ta haya mi mes ta bringa pa interes di e bario, pa busca solucion pa tur hende.” Balentina a mustra riba diferente persona cu a perde miembronan di famia pa motibo di e dump. Cas di su mayornan ta mas cerca ainda di e dump, cu ta motibo di preocupacion mas grandi. Pero ta e problema di e sludge cu realmente a pone Anouk Balentina kibra emocionalmente. Pasobra enbez di solucion, ta parse cu ta bin mas problema di salud pa e bario.

E mes a trata di tuma contacto cu DVG, Departamento di Salud Publico, pa mira kico nan por haci, pero e no a haya contacto cu nan. Bon Dia Aruba a comunica cu Dr. Wilmer Salazar kende a bisa cu e asunto di e sludge ta algo cu tin nan atencion pero cu nan no por haci nada. E ta un responsabilidad di DOW y a avisa DOW na varios ocasion cu mester busca otro luga pa hiba e sludge aki y no expone e material aki pa crea molester. Pero mas DVG no por haci, ta locual Bon Dia Aruba a compronde di Dr. Salazar.

Director di DOW, Marlon Croes a bisa cu ta sigui e protocol pa kima e sludge. Mester lag’e seca pa despues hink’e den e incinerador pa kima. “E protocol ta cu mester kima tur locual cu ta riba e ‘tipping floor,’” Croes a bisa, refiriendo na e sludge cu ta a plama pa seca. “E mester bay den e incinerador.”

Sinembargo, Croes no splica si esaki ta bay ta e realidad di e bario, esta cu mester ta prepara pa cada biaha ta trece e material aki pa kima.

E bisiña cu a scoge pa keda anonimo a bisa Bon Dia Aruba cu e condicion di dump ta afecta salud y sigur calidad di bida. E mes a haya pulmonia y no tabata nada relata na COVID-19 of un griep. Despues di hopi analisis, dokternan a saca afo cu e tabata infecta cu un bacteria. Y awor e ta prohibi pa cana banda di dump. “Pero ta henter e caminda te Varadero ta afecta pa e sushedad den aire,” el a bisa Bon Dia Aruba.

E cabayero cu tambe a nace y lanta na Cas di Paloma ademas a bisa cu henter e bario tin aña ta mira e sero di sushi ta crece. “Ora mi yiunan tabata chikito, nos por a mira lama for di cas (red. potret ta di e persona, saca como 30 aña pasa). Awe ta mira un sero enorme di sushi y apesar cu nos tur mester paga un grondbelasting mas halto cu por ehempel na Mahuma, nos casnan tur a perde balor. Ta ken kier cumpra un cas na Parkietenbos, Simeon Antonio, Cas di Paloma, cu un dump cu tur dia ta na candela?”