(AP) – Durante e ultimo simannan aki, criminalnan cu ta secuestra datonan online a tuma como trofeo por lo menos tres oficina di seguro Norte Americano cu ta yuda otro personanan sobrevivi e atakenan di extorcion cu ta paralisa datonan cu nan mes a yega di experiencia.

Criminalnan cibernetico cu ta hack e sistemanan corporativo y di gobierno pa horta datonan sensitivo y sumamente priva pa extorcion, tin como rutina purba di saca afo cuanto cobertura y proteccion cibernetico e victimanan tin. E dato di cuanto un victima por paga ta yuda duna un idea di cuanto nan lo por demanda durante negociacion. E industria di siguransa cibernetico tambe ta un victima excelente pa criminalnan cu ta purbando di busca e siguiente victima y na mesun luga saca afo cuanto proteccion e victima tin.

Prome cu e crimennan cibernetico aki di secuestro di datos a bira un epidemia global cu ta atakando negoshinan, hospitalnan, scolnan y gobierno local, e industria di siguransa cibernetico tabata uno di poco popularidad. E tabata acusa di motiva e criminalnan pa motibo cu tabata recomenda e victimanan pa paga, pero a yuda proteha hopi di caba den bancarota.

Aworaki e industria no ta mira den mesun rango cu criminalnan, sino a bira un industria cu ta lagando ganashi mirando un crecemento di mas cu 400% desde aña pasa su casonan di secuestro di datonan, y extorcionnan cu ta sigui aumenta.

Fabian Wosar, hefe di oficialnan tecnico na Emisoft, un compania di siguridad cibernetico cu ta specialisa den secuestro di dato a declara cu e actitud entre dunadornan di e servicio di seguro ta di bisa e victimanan pa paga e demanda. Pa motibo cu esey lo ta e opcion menos costoso pa tur esunnan envolvi.

“E gruponan aki a cuminsa pidi hopi demasiado lihe. Esaki ta haci cu e calculo pa cu e beneficio di e seguro inicialmente usa pa por saca afo si un persona mester paga e demanda of no, no ta aplica mas” Wosar a comenta.

Te ainda no ta cla con e secuestro mas grandi di dato den record lo impacta e companianan di seguro cibernetico, pero no ta premira resultadonan positivo.

Presion ta creciendo den e industria pa stop e cobertura di secuestro.

Den mei, e compania grandi di seguro cibernetico AXA a dicidi di haci esaki cu tur e polisanan nobo den Francia. Pero aparentemente e ta e unico compania haciendo esaki den e industria, y e gobierno no tin planes di haci esaki un ley tampoco.

AXA ta un di e companianan mas grandi cu a sufri di e atakenan cibernetico aki, cu e operacionnan den Thailand ricibiendo e golpi mas fuerte. CNA Financial Corp, basa na Chigaco, cual ta den luga number 7 di siguridad cibernetico na Merca a wak su rednan paralisa den maart.

Menos di un siman prome cu esaki, e compania di siguridad cibernetico Record Future a publica un entrevista cu un miembro di e gang Ruso REvil, cu tin talento den pre-atake, cual ta e coleccion di datonan y inteligencia, y tambe ta forma parti di e atake actual. Su persona a sugeri cu e ta ataka companianan cu ta brinda seguro pa asina por yega na e clientenan.

CNA no a confirma si un reportahe di Bloomberg, cual a indica cu e compania a paga 40 miyon dollar den demanda, cual lo ta e pago mas halto den record, ta berdad of no. Ni tampoco a comenta tocante cuanto of cual datonan a ser horta for di nan red. E compania solamente a bisa cu su sistemanan unda cu “e mayoria di e datonan cu tin e informacion tocante e polisanan no a ser impacta.”

Den documento regulatorio cu Securities and Echange Commission, CNA a declara tambe cu su perdidanan posibelmente no lo ser completamente cubri pa e seguro, y cu “seguro di proteccion di siguridad cibernetico lo ta dificil di obtene den futuro, y probablemente solamente lo ta disponibel na prijs nan mas halto.”

Otro compania grandi di seguro cu a ser ataka pa e secuestro di datos tabata Gallagher. Aunke su atake a tuma luga na september, solamente siman pasa aki, dia 30 di juni, el a revela cu e criminalnan a horta datonan hopi detaya di un cantidad no specifica di cliente. Di password, paa numbernan di identidad, pa datonan di tarheta di credito y diagnosisnan medico. Vocero di e compania Kelli Murray no a bisa si algun otro polisa di seguro a ser comprometi. Ni tampoco a revela si Gallagher a paga e demanda of no. E criminalnan, di e gang yama RagnarLocker, aparentemente nunca a publica informacion tocante e atake den nan sitio web, cual ta sugeri cu Gallagher a paga e demanda.

Di e 3 companian di seguro cu e gangnan aki a ataka den e simannan reciente, cu a publica datonan horta riba nan sitio web como evidencia, dos den Montreal y uno na Detroit, nongun no a responde yamadanan telefonico ni tampoco e-mail. E di 3, cual ta basa den California, a admiti di ta scondi pa un siman caba.