Ayera atardi, directiva di fundacion Parlamento Hubenil (PH) a ofrece un conferencia di prensa pa medionan di comunicacion local y di e manera ey informa comunidad cu nan ta den buskeda di ideanan pa e organisacion y e campaña di creacion di un logo nobo.

Dave Martinus presidente a splica cu aña pasa na luna di september nan a eligi su directiva nobo y di e manera ey nan a drenta den un era nobo pa cu Parlamento Hubenil, el a menciona cu esaki ta importante pa motibo cu nan ta kere cu hobennan den comunidad tin e oportunidad di trece nan bos dilanti.

Martinus tambe a bisa cu PH ta para tambe pa cu a traves di tur e tratado di derechonan di mucha y esey por bin dilanti pa nan por organisa nan mes, haci proyectonan pa por yuda mas y mas posibel den desaroyo di e hobennan.

Asina mes, el a sigura cu durante añanan nan ta bin haciendo training y diferente workshop y cu na e momentonan aki nan ta yegando den e fase caminda cu nan a cuminsa cu un restructuracion di organisacion di Parlamento Hubenil.

E vision cu nan di PH ta cu nan ta mira hopi hoben na Aruba cu por ta envolvi den e organisacion y asina nan por yuda comunidad y hubentud pa por desaroya den personanan cu tin e capacidad pa yuda maneha nos pais y tambe cu ta bon prepara pa yuda guia e otro hobennan den comunidad.

Martinus a expresa cu manera ta conoci pa hopi biaha hobennan ta keda dirigi basa riba influencia y esey ta nifica cu un influencia positivo nan por yuda crea bou di hobennan mas tanto impacto positivo den comunidad di Aruba.

Ayera atardi PH a lansa un campaña pa crea un logo nobo pa e organisacion na unda Glendeline Arends Maldonado cu ta jeugd coordinator di PH a splica cu pa via di e fase di transicion aki nan kier reposiciona nan mes den comunidad pa asina ofrece e hobennan e oportunidad di vocifera nan bos.

E logo cu PH tin ta for di aña 2009 y loke nan kier haci ta pa via cu nan ta sinti cu PH mester di un face lift den comunidad na unda nan kier haciel’e di un forma cu tur hende por participa den esey y yuda nan.

El a conta cu nan a renoba nan localidad pa asina haciel’e mas atractivo pa e hobennan y awor nan ta bay na e siguiente fase cu ta e logo nobo, pa esey Arends a menciona cu nan ta promove e participacion di hobennan den comunidad na un forma cu tur hoben di tur edad por participa y laga nan creatividad sobresali pa asina yuda nan yega na nan logo nobo.

E campaña ta encera cu cualkier persona di tur edad por diseña un logo cu ta refleha e derechonan di mucha y hoben den un manera creativo cu enfasis riba libertad di opinion, expresion y informacion teniendo na cuenta respet pa otro, libertad di pensamento, creencia y religion. Ademas di esey e diseño mester tin un descripcion di kico ta trata pa asina nan di PH lo por scoge e logo ganado cu por keda crea cu pintura, sketch of digital. E diseño ganado lo keda conoci dia 12 di augustus cu ta dia internacional di hubentud.

Den e premionan cu por gana cu te ainda no a keda informa, Arends a sigura cu loke nan semper tin den nan mente ta pa esey ta algo cu por yuda e hobennan den nan educacion, bida diario y den nan desaroyo, nan lo anuncia esey ora lo haya confirmacion di kico e premionan lo ta.

Pa personanan interesa cu lo kier participa den esaki, Arends a bisa cu por tuma contacto na e-mail: info@pharuba.org of na e telefon 588.6860.

Di loke ta trata actividadnan di PH, Arends a sigura cu nan igualmente cu Aruba henter a keda confronta cu pandemia Covid-19 na unda actividadnan a baha un poco pero e aña aki nan ta un tiki mas activo, na unda nan a ofrece diferente training, entre otro como training di debate, asina como tambe nan a haci proyecto pa splica e hobennan con por haci campaña politico mirando cu eleccion a tuma luga y tambe di diferente topico como branding.

PH ta componi di 26 miembro cu ta activo segun Arends a menciona y cu e miembresia ey nan kier prepara e hobennan pa asina nan por tin impacto riba esunnan di afo pero no limitando e cantidad di cuanto hobennan por bira miembro, pa cu esaki Arends tambe a manda un mensahe pa encurasha hobennan cu kier siña y expresa nan mes, duna nan opinion y participa na diferente sorto di proyectonan pa asina tuma contacto cu nan pa forma parti di PH.