WEB lo cuminsa un investigacion pa haya sa kico ta e causa di e black out

Despues cu diasabra Aruba a keda afecta cu un Black Out, ayera atardi WEB Aruba a ofrece un conferencia di prensa pa trece dilanti kico precies a sucede y kico ta e fayo cu a causa e interupcion di coriente riba isla.

Luis Oduber director di e compania cu tabata acompaña di Richard Frank hefe sector di produccion, Francis Ras hefe sector di mantencion, Joseph Everon hefe di sector di asuntonan operacional tecnico y Randolph Ruiz director financiero, primeramente nan a ofrece algun palabranan di dispensa na henter comunidad pa loke a sucede diasabra ultimo dia 3 di juli y cu ta algo cu ta “fuera di nan alcance”.

Oduber a splica den secuencia cu diasabra ultimo for di 3or di merdia operadornan di central a haya un melding riba e boiler number 3 y na momento cu nan a start e turbina cu nan tin riba diesel pa emergencianan y precaucion por si algo lo pasa na e boiler, e boiler a keda stabilisa, despues cu no tabatin mas alarma despues pa 4.20 di atardi nan a paga turbina ey y e operacion a keda stabilisa.

Despues di 5or nan a bolbe cende e turbina riba diesel pa asina stabilisa e sistema y wak kico ta e problema cu e boilernan cu a cay afo y bolbe reestablece coriente lo mas pronto posibel pa consumidonan pero un par di minuut despues un di e mortonan di reset tambe a cay afo y na e momento ey pa trece stabilidad nan a mester a saca e veld di Elmar 1 cu ya caba tabatin number 5 y number 6 afo.

Mientras operadornan tabata haci esfuerso pa stabilisa tur e sistema y por sigui reestablece coriente pa comunidad, nan a haya problema na boiler 6 cu tabata e unico cu a keda ariba tambe a trip.

“Na e momento ey tur turbina cu ta linea pa proteccion di servicio a cuminsa cay riba nan mes y poco a poco nos a drenta den un black out pa 6.24 di atardi”, Oduber a conta.

Tambe, el a bisa cu na WEB na e momento ey tur cos tabata out, cierto ekiponan y sistemanan cu nan tin di back up como computernan tabata e unico cu tabatin coriente y den un rato nan mester isola pa asina por haya sa na unda e problema tabata ta y purba di trece e coriente back.

Pa mas o menos 7.15 Oduber a bisa cu nan a start nan prome motor, siguientemente nan a start e turbina riba diesel y na e momento ey conhuntamente cu Elmar nan a reestablece coriente internamente den WEB pa asina cuminsa suministra coriente back pa e pueblo.

Door cu e problema inicialmente tabata mustra cu a cuminsa na e boilernan, nan a tuma e decision pa start e motornan so mientras cu nan tabata sigui busca kico tabata e problema den e boilernan.

Asina poco a poco nan a cuminsa start motornan pa cuminsa suministro di coriente pa algun barionan despues di 8or di anochi, “bo no por tin hopi ekipo riba linea di servicio si bo no tin e demanda, kiermen cu esey ta bay stap pa stap” Oduber a sigura.

E proceso pa start up cu ta bay balansa e boiler y turbina ta bay poco a poco y durante esey nan tambe a haya algun dificultad, ta p’esey cu e proceso di reestablece coriente a tarda hopi manera Oduber a menciona y cu Elmar tambe tabatin cierto incidentenan cu pa 5.15 di diadomingo mainta Aruba a haya coriente back completamente.

Oduber a duna di conoce cu nan ta bay haci un investigacion profundo, pa motibo cu tin indicacion cu un di e carchinan di control di e procesador di boiler 3 a faya, pero nan tin cu confirma esey ainda.

Asina mes, el a splica cu boilernan y turbinanan ta tecnologia bieu cu nan ta den proceso di reemplasa nan cu proyectonan nobo cu motor y esey lo garantisa un miho suministro di coriente na momento cu un otro black out lo tuma luga por restart mas lihe un motor cu un boiler.

Te cu ayera diadomingo atardi tabatin areanan cu problemanan di coriente y pa esaki, Oduber a sigura cu esey tabata den e red di distribucion di Elmar, door di e feeder pa Sabana Blanco no por a cera y nan tabatin problemanan cune y por haya cu cierto di e kabelnan ta bay haya sobrecarga y e coriente por bay den barionan.

Te ayera atardi, nan tabatin tres boiler y tres turbina ariba loke Oduber a comenta cu esey tabata nifica suficiente capacidad pa nan y segun Oduber a informa WEB no tabata coriendo risico, “siempre y cuando algo por sucede cu un di kabelnan mayor por presenta algo pero nos no ta verwacht nada na e momentonan aki”, el a expresa.

Den e caso aki, el a splica cu tabata trata di un fayo cu a presenta cu un carchi di un computer cu su proceso a faya y door di esey ta dificil pa punta dede riba un hende cu por a causa esey, “ta ekiponan y sistemanan hopi complica cu ta traha hunto cu otro, p’esey e proyectonan di automatisacion ta mas miho pa por reacciona mas rapido”, Oduber a afirma.

Di loke ta trata e molinanan di biento, el a conta cu esey ta e ultimo cu nan ta pone den servicio den caso aki di black out y motibo principal ta cu diasabra ultimo y ayera tabatin hopi biento, esey ta causa un desbalansa den nan produccion, ora cu tin un black out nan ta purba di stabilisa prome y despues nan ta pone e molinanan di biento den servicio.

Den conferencia di prensa a trece e pregunta si lo recompensa algun ekipo cu por a wordo daña pa via e black out aki pa lo cual Oduber a bisa cu nan mester ta clientenan di Elmar y cu hunto cu WEB nan lo studia kico lo a sucede y e lo wordo evalua pa cubri e casonan aki.

Tambe, a wordo treci dilanti cu algun ciudadanonan a presenta problemanan cu awa y pa cu esaki Oduber a manifesta cu na Aruba tur sistema di awa tin pompnan di WEB cu ta pompnan cu ta bay na e barionan cu a cay afo durante e black out y na dado momento tur presion ta depende riba gravedad, gravedad den e tankinan pa por yega te na e casnan.

“Na dado momento bo por haya un presion cu bo no custuma cunel’e”, el a sigura.

Pa finalisa, nan a duna di conoce cu esaki no tabata e black out mas largo den historia di Aruba, esun di mas largo a tuma luga na aña 2002 y a dura 24ora aproximadamente.