Ayera mainta, Sindicato di Polis di Aruba (SPA) a firma un convenio di colaboracion cu cuater sindicato di polis di e ruman isla di Corsou pa asina yuda otro den tempo cu ta bini, mirando cu nan lo tin cu deal cu e Landspakket.
Asina e presidente di e sindicato Jose Dirks a menciona den un conferencia di prensa cu ya un tempo pasa caba SPA a firma un convenio cu sindicato SAP di Corsou pero loke nan kier ta pa amplia e plataforma aki y asina ey nan ta firma un otro convenio cu tur e sindicato cu ta representa polisnan na Corsou.
“Vooral na e momentonan aki cu e Landspakket cu ta bayendo y cu ta mustra cu nan kier unifica nos back atrobe” Dirks a sigura.
Un ehemplo di esaki ta cu si tin un hurisprudencia cu ta valido na Corsou e ta valido na Aruba tambe, y di e manera aki nan lo por intercambia ideanan y yuda otro pa bay dilanti, manera Dirks a menciona.
Amado Vilchez, presidente di Sindicato Ambtenaarnan di Polis y Cadena Hudicial di Corsou (SAP) a splica cu liderazgo ta e capacidad pa transmiti vision den realidad, na unda nan a haci un convenio y nan ta bay sirbi conhuntamente como un impulso mirando e retonan cu tin na pais Corsou y tambe na Aruba pa traspasa conocemento, tur lo cual cu ta toca y cu por sirbi pa e causa comun cu nan tin, basa riba cada un su realidad.
“Den convenio aki bo ta respeta cada un su statuutnan den pensamento, strategia, liderazgo y tambe den loke tin di haber cu mundo sindical” Vilchez a sigura.
Juan Lourens, presidente di sindicato STRAF a indica cu un convenio manera esun aki ta asina importante pa motibo cu nan ta sirbi como un forma cu e defensa y trabou cu sindicalistanan tin pa sali na interes di su miembronan, ta wordo fortifica den tur forma y esaki lo trece cune cu nan ta sostene otro tanto den informacion, asistencia ora esey ta necesario pa motibo cu nan ta kere cu e meta final mester ta e miembro y e mester ta bon sirbi.
Nan tin pensa di reuni como sindicatonan colaborado di un pa dos biaha pa aña manera Lourens a sigura pa comparti e informacion cu por sirbi na bienestar di e miembronan.
Tambe, Thaïse Isidora Lo-A-Njoe presidente di sindicato NAPB di Corsou tabata presente a bisa cu ayera tabata un dia historico pa nan cu e firma di e convenio aki na unda sindicato ta para pa union y pa su miembronan, firmando esaki nan ta mustra cu nan ta uni y cu nan ta bay bringa pa cada un di nan miembronan pa motibo cu na final sindicato ta pa representa nan.
Pa finalisa, Alfred Suares representante di e sindicato ABVO un di e sindicatonan mas grandi di Corsou a comenta cu nan a forma un bloki aliansa pa trata casonan hudicial vooral di polis, y aworaki nan ta uni na esaki hunto cu SPA cu pa su persona esey ta un paso grandi pa hunto nan por haci tanto pa Corsou como pa Aruba.
