Evelyn Wever-Croes tocante ley screening: “Prome compromiso ta pasa ley y percura cu Sr. Sevinger wordo saca for di Parlamento si e logra huramenta”

Durante un conferencia di prensa, prome minister demisionario Evelyn Wever-Croes a informa pa Bon Dia Aruba cu e ta comparti e preocupacion y cu ta un berguensa pa pais Aruba e nombracion di e parlamentario Benny Sevinger cu na e momentonan aki ta deteni na KIA como sospechoso principal den e caso Avestruz.

Wever-Croes a indica cu esaki no ta trata di un candidato di su partido ni di un colega di dje pero “e ta un Arubiano y a nos como Aruba ta bay den historia pa e berguensa aki cu lamentablemente e partido AVP ta pone nos pasa aden cu e nombramento di e parlamentario Sevinger”.

Asina mes, el a declama cu na e momentonan aki tin un ley na parlamento tocante screening y esey ta un compromiso cu nan tin manera nan lo huramenta otro siman como parlamentario, el a sigura cu un tempo e lo fungi como minister presidente y otro como parlamentario pa un tempo transitorio “e prome compromiso ta pa pasa e ley ey y percura cu Sr. Sevinger lo wordo saca for di parlamento si e lo logra huramenta”, Wever-Croes a sigura.

Tambe, el a splica cu e segundo paso ta e constitucion na unda lo hancra den dje cu e tipo di cosnan aki no lo pasa nunca mas “pasobra mi no ta kere cu tin un Arubiano riba e pida di baranca aki awe cu no ta sinti berguensa di loke por pasa otro siman” el a bisa.

Pa hancra esey den constitucion el a menciona cu mester di dos tercera parti y ta p’esey cu nan mester mas sosten den parlamento, e cambio den constitucion no ta cla ainda y esey no por sucede den siman aki ni den dos siman manera el a sigura, tin cu cana su caminda na Raad van Advies y “lamentablemente un otro cambio di constitucion cu si nos purba trata den nos gobierno tabata pa hancra Ombudsman den constitucion y e no a conta cu sosten ni di RED, ni di Sra. Daphne Lejuez ni di AVP y asina no por a pasa” el a bisa.

Pa finalisa, el a enfatisa cu e ta espera cu e parlamento nobo cu lo huramenta otro siman por “demostra e madurez y por pasa riba diferencia di politica y pone interes di Aruba na prome lugar”.

Manera a keda conoci e candidato number 29 riba lista di partido AVP Benny Servinger a logra di saca su mes pa loke ta trata votonan individual di eleccionnan di dia 25 di juni ultimo, cu esaki el a keda den e lista di e posibel 21 parlamentario cu lo por conforma e parlamento di aña 2021 pa 2025.

Ademas, manera Bon Dia Aruba a anuncia ayera den un publicacion ta conoci cu Ministerio Publico lo por coopera pa cu Sevinger por wordo sali for di KIA y bay huramenta como parlamentario, pa despues bay back den prison.