Mester tin e aanlegvergunning y no ta permiti pa mishi e mangelnan na Savaneta

Aruba Ocean Villas lo por continua cu su construccionnan, pero unicamente si e haya su asina yama aanlegvergunning. Pero Huez lo no opina si e otro permisonan cu e desaroyadornan tin den nan poder ta contra principio di bon gobernacion.

Esey tabata decision di huez mr Verhoeven ayera, riba e caso sumario cu Fundacion Parke Nacional Aruba, FPNA y Fundacion Commandeursbaai a lanta contra Pais Aruba y Aruba Ocean Villas. Obhetivo di e Caso Sumario tabata pa para tur actividad di construccion na e area di Aruba Ocean Villas y considera cu e permiso di construccion no ta na su luga mirando e daño grandi na naturalesa.

Vriendjespolitiek

Manera ta conoci, e dos fundacionnan a demanda pa para e proyecto di Aruba Ocean Villas, unda a argumenta cu e permisonan cu e desaroyadornan di e baotique hotel na Savaneta ta basa riba nepotismo y vriendjespolitiek. Esey ta motibo tambe pakico a pidi huez pa considera e permisonan cu Gobierno a duna caba pa e hotel como ilegal, particularmente pa motibo cu e proyecto, den nan concepto ta causa un daño ireparabel na naturalesa.

A usa e Plan Ordenanza Espacial, ROP como argumento dilanti huez, ademas cu a mustra cu a duna Aruba Ocean Villas mas tereno, tanto den lama como riba tera, cu tabata den e peticion di 2012 y cu a duna un opcion pa mas tereno a apenas na Februari aña aki, pa mesora despues pasa e acta notarial.

Daño na mangel y yerbe di lama

FPNA di su banda a argumenta cu e proyecto ta den areanan di mangel cu ta protegi, y cu actividadnan di e baotique hotel lo pone e mangelnan aki na peliger, mescos cu e crecemento di yerba di lama y coral. FPNA a usa opinion di experto di Dutch Caribbean Nature Alliance, Tadzio Berevoets kende a bisa cu si stroba crecemento di yerba di lama, e ta nifica cu turtuganan, calco, kreeft y gutu lo no por sobrevivi na e area y cu e desaroyador no a tuma paso pa mitiga e impacto. Mas ainda, mas actividad, mas bungalow riba awa lo produci mas sobra cu ta stroba e funcion natural, ademas cu lo trece animalnan manera djaca, rato y otro cu ta empeora e impacto riba naturalesa.

Di su banda abogadonan di AOV a bisa cu a pesar cu DOW a hala atencion di propietario Henriquez na 2016, pero esey no ta nifica cu Gobierno no por cambia di pensamento pa sostene e proyecto. Y e opcion cu a duna dia 24 di Juli 2019 ta bao condicionnan hopi stricto cu finalmente a conduci na entrega di e tereno den erfpacht na 12 di Maart 2021. Riba dje, tabatin un cantidad di corespondencia for di prome momento cu Henriquez a pidi pa e opcion, for di 2009 te cu e ultimo, dia 26 di October 2015, pues no ta cuestion cu a core duna e tereno den forma di nepotismo, vriendjespolitiek of clientelismo.

Permisonan di construccion y ROPv

Huez a conclui cu AOV tin su permisonan. Si Gobierno por a duna permiso bao di circunstancia cuestionabel of si e permiso ta bay contra interes di otronan, no ta core pa cuenta di e desaroyador, kende mester por confia cu e por actua segun e permisonan legal cu e tin, huez Verhoeven a bisa.

Pa loke ta e Reglanan di e Plan di Ordenanza Espacial, ROPv di 2019, Huez a mustra cu a indica cu a crea espacio pa tres proyecto chikito di bungalow riba lama, basta cu esakinan no causa daño na e balornan natural. Den otro palabra, e ROPv ta permiti e proyecto di AOV (red. manera ta conoci, e otro dos proyectonan lo no por sigui despues cu Marinierskazerne a manda un carta di protesta pa mustra cu nan lo ta mucho cerca di su facilidadnan). Huez a bisa en todo caso, cu e desaroyador mester por confia cu a duna e permisonan teniendo cuenta cu e ROPv, y cu e caso sumario no ta e luga unda FPNA y Fundacion Commandeursbaai mester pidi pa declara di antemano, e permisonan nulo, basa riba ponencia cu nan lo causa daño na e balornan ecologico. Es mas Huez a mustra cu e argumentonan di daño no a keda basa riba investigacion. No tabatin prueba pa bisa cu e construccionnan di AOV ta causa daño ireparabel na medio ambiente.

E uso di e saliña tambe ta permiti segun e ROP, ya cu e actividadnan limita di vivienda y atraccion turistico, Huez Verhoeven a bisa y como tal no por bisa cu AOV ta bay afecta e clima di biba y na e balornan ecologico presente.

Mangel mester keda protegi

Locual si Huez a considera ta cu a cu AOV a bisa di no a mishi cu e mangelnan, tin indicacion cu esaki a sosode. Pues FPNA y Fundacion Commandeursbaai a demostra esaki y esey ta motibo pa kico a instrui cu no por traha den e mangelnan cu ta parti di reserva natural di Aruba. Den otro palabra Huez a prohibi cualkier actividad di construccion den e area di mangel.

Pero e huez a rechasa e peticion pa prohibi Gobierno pa duna permiso den futuro, pa motibo cu e dos fundacionnan no por a demostra cu berdad tin intencion pa haci esaki. Mirando cu no tin ningun indicacion cu Gobierno tin intencion di duna permiso pa actividad den e mangelnan, Huez no a haya necesario pa considera e peticion di FPNA ni Fundacion Commandeursbaai.

E exigencia pa prohibi Gobierno pa duna permiso di construccion riba e saliña y den lama, segun leynan nacional y internacional no ta algo cu un Huez civil por tuma decision, ya cu e ta cay bao tereno di Corte Administrativo, pues e argumento aki tambe a keda rechasa.

Cada partido ta carga su gasto legal

Mirando cu a rechasa ponencia di uno y acepta di otro, den e caso aki, cu AOV a cuminza e trabaonan di construccion sin e aanlegvergunning cu berdad a pidi, pero ainda no ta den man di e desaroyadornan, Huez a dicidi cu tur partido mester carga nan gastonan pa e caso.

Como tal, e sentencia ta cu J.O.B Leisure y J.O.B Holding ta prohibi pa haci cualkier trabao di cobamento, of actividad di construccion den e area di mangelnan. Ta prohibi pa haci cualkier construccion den e area di lama tanten cu no tin e aanlegvergunning, mescos ta conta pa e trabaonan den e saliña. Mester di e aanlegvergunning. Den caso cu haci cualkier trabao sin e permiso specifico aki, J.O.B. di Aruba Ocean Villas lo mester paga un boet di 10 mil florin pa dia te na un maximo di 1 miyon florin.

Bon Dia Aruba a tuma contacto cu Osyth Henriquez, doño di Aruba Ocean Villas, kende a bisa di ta contento cu e sentencia, y cu ta bay warda e aanlegvergunning. “Nos a pidi e aanlegvergunning prome cu a bin cu e caso. Nos a haya conseho positivo di Directie Natuur en Millieu y nos tabata warda riba e aanlegvergunning, ora cu e caso a bin. Awor ta djis di warda un poco mas,” Henriquez a bisa.

Norman Kuiperi di Fundacion Parke Nacional Aruba a bisa cu tur e partnernan ta bay studia e sentencia prome cu duna un declaracion y tambe pa determina kico lo por ta e siguiente paso.