(LaPatilla) – Tres caso di labamento di placa ta tira pista ariba e mecanismonan aplica den actualidad pa rednan criminal pa saca placa for di Arco Minero y pone esaki riba mercado internacional.
Dos caso a keda exponi den cortenan di estado di Florida, Merca, mientras cu e di tres huicio a cuminsa na Corsou y na juni un decision a yega na e corte supremo di Reino Hulandes.
Tur e casonan tin como factor comun cu e oro ta wordo saca for di un mina na estado Bolivar. Di eynan e ta wordo hiba via lama of aire te Corsou unda ta dicidi e destino caminda e lo wordo bendi, hopi biaha usando documentonan cu ta sconde e berdadero origen di e cargamento.
Segun declaracion di e agente special di FBI William Donaldson, e contrabandistanan no ta reconoce cu e oro ta bin for di Venezuela, pues asina nan ta evita un ordo ehecutivo cu a keda emiti na november di 2018 pa e ex-presidente Donald Trump, cu tabata prohibi cualkier negociacion cu e mineral aki, si e tabata bin for di e pais goberna pa Nicolas Maduro.
E agente Donaldson a duna e declaracion aki pa sostene un acusacion pa blanca di capital contra Jesus Gabriel Rodriguez JR, ken tabata fungi, te cu e aña aki, como presidente di Tansvalue INC, un compania dedica na e transport di obhetonan di balor na Florida.
E investigacion contra Rodriguez JR y Transvalue ta conecta na otro investigacion hudicial ariba e actividadnan di e compania NTR, cu tabata perfecciona ariba tereno Mericano e oro cu tabata bin for di Venezuela, sabiendo cu tabata trata di contrabando. NTR ta un compania registra na Texas pero e tin oficinanan na Doral, unda e oficina di Transvalue tambe ta situa, segun registronan di corporacionnan di Florida.
