No tin ningun decision tuma den partido Accion21 y directiva a dicidi pa no duna ningun informacion te despues di partijraad, cu ta otro siman. Asina lider di e partido Miguel Mansur a bisa Bon Dia Aruba.
Mansur a reacciona riba e pregunta si berdad tin problema den e partido y cu lo por a suspende dos candidato di e lista, incluso candidato nr. 2 Daphne Lejuez, cu te ainda ta Parlamentario. Lejuez, kende tabata riba lista di MEP, a bira Parlamentario Independiente despues cu e no tabata de acuerdo cu su fraccion a sostene plannan pa e incinerador na dump.
No ta conoci kico por a conduci na e supuesto diferencianan den Accion21, particularmente mirando cu sra. Lejuez a crece den voto compara cu 2017 y ta e di dos candidato cu mas voto di e partido. E ta sigui Miguel Mansur mes kende a ricibi riba 2000 voto.
“Awe e reunion di directiva ta sigui y no a tuma ningun decision ainda,” Mansur a bisa Bon Dia Aruba ayera. “Mi no por comenta riba algo interno cu probablemente lo no culmina te otro siman Diaranson, despues di partijraad. Tur proceso ta canando segun nos statutonan,” el a agrega.
Bon Dia Aruba a acerca Daphne Lejuez pa su declaracion, kende a ripiti locual Sr. Mansur a bisa, esta cu tin combersacionnan tumando luga y tin mas pendiente y como tal, e tampoco por duna un comentario. El a agrega cu tur tin e mesun interes na pecho, cu ta esun di e partido y particularmente di Aruba.
