Respetabel señor Rosenstand,

Pa medio di e presente, tur firmante, docente y miembronan di personal cu ta traha na Colegio Arubano, ta dirigi e carta aki na su persona, como presidente di Directiva di Stichting Voortgezet Onderwijs Aruba (SVOA), relaciona cu e tema ariba menciona: Revocacion pa motibo di desconfiansa den tur e miembronan di Directiva di SVOA.

Referiendo na diferente situacion y incidente cu a pasa durante e ultimo periodo, categorisa como negativo, e cuerpo di docente a tene varios reunion, a discuti riba diferente topico y a yega na diferente conclusion.

Como consecuencia di esaki nos lo discuti un seri di cuestion, punto pa punto.

  • Forma di dirigi di Directiva

Directiva a mustra di a adapta durante e aña cu a pasa un estilo di dirigi dictatorial top-down. No tabata tin comunicacion efectivo ni transparente y sin conta cu aporte di e cuerpo di docente. Resultado di esaki tabata cu masha lihe despues cu Directiva a asumi e encargo a surgi situacionnan perturbante den e cuerpo di docente.

  • Decisionnan

Den e aña cu a pasa, e cuerpo di docente a haya nan confronta frecuentemente cu decisionnan unilateral tuma door di Directiva, cu tabatin consecuencianan di duracion largo pa scol como institucion den e sociedad Arubano, pa e mayornan, e studiantenan y e docentenan. Esaki a conduci cu Colegio Arubano a perde su posicion importante como un instituto di formacion den e cuadro Arubano. Esaki nos no por aproba, ni acepta.

  • Statuut

A base di e cambionan realisa den e composicion di Directiva y di e Statuut di SVOA, entrante 1 di januari di aña 2021, nos a constata cu Directiva ta fortalece su posicion dominante y ta debilita esun di e docentenan. Actualmente no tin niun mayor cu tin un asiento den Directiva, locual ta un perdida grave.

  • Experticio financiero y educativo

Na november di aña 2020, e ex miembro di Directiva, señora Brechtje Huiskes a tuma su retiro debi cu e no tabata satisfecho cu funcionamento di Directiva. Posteriormente, Directiva ta consisti di tres miembro, mientras cu segun statuut mester ta cinco miembro. Actualmente, e presidente di SVOA ta consehero di Recurso Humano di SVOA, como tambe asesor huridico di Minister dimensionario di Educacion; mas tur otro titulo. Nos ta considera e forma aki uno di conflicto di interes y no ta un bon señal di maneho. Remarcabel ta cu e dos otro miembronan di Directiva apenas tin afinidad cu educacion.

Resumiendo nos por conclui tambe, cu atencion riba e puntonan cu a bin dilanti, cu e Directiva actual den cualkier caso ta carece di cualidad pa afronta e retonan di Colegio Arubano y dirigi nan den e direccion corecto. Aki nos ta menciona entre otro e reparacion di e daño como consecuencia di e pandemia Corona, duna contenido na identidad y signatura di scol den sociedad, manera soluciona e alarmante y creciente escases di docente.

Pa Aruba su bienestar, particularmente pa e mucha Rubiano y Colegio Arubano, por lo tanto ta Necesario pa Inmediatamente, un Directiva nobo tuma e control di scol na un manera profesional, energetico y cu respet y curason pa e scol, y duna Colegio Arubano un biaha mas e atencion debido.

Finalmente, e cuerpo di docente ta determina categoricamente cu ya no ta existi base di confianza den e miembronan di Directiva di SVOA y ta exigi a base di desconfiansa pa e miembronan di Directiva tuma nan retiro Inmediatamente.

Atentamente,

Cuerpo di docente di Colegio Arubano, conforme e lista adhunto.