Treciendo dilanti loke a tuma luga diaranson ultimo na Hoofdstembureau Aruba cu diferente partidonan politico a pidi re-conteo di votonan pa via di algun iregularidad cu segun e mesun candidatonan a reporta, partido MAS tambe a trece su opinion tocante esaki.

Marisol Lopez Tromp lider di e partido a sigura cu durante henter campaña electoral tur candidato a cana cas pa cas pa sigura e personanan cu cada voto ta conta, “nos hasta a stimula e ciudadanonan cu no tabata motiva pa bay vota pa haci uso di e derecho di pasobra cada voto in un balor”.

Di loke a tuma luga diaranson, Lopez Tromp a indica cu varios caso a wordo presenta den e reunion cu Hoofdstembureau y vooral un caso specifico den e partido MAS caminda un candidato di e partido aki su mes a bay vota na urna 29 di Fatima College hunto cu su famia y despues el a tuma nota cu den e urna specifico aki el a haya 0 voto.

“El a yena e voto corecto den e bala, el a mark’e bon y no a sali afo y e ta mira cu den e caso aki ni di dje di su familiarnan no ta conta, kiermen henter e pensamento democratico cu nos tin cu cada voto ta conta, bo ta sinti bo den esaki manca” el a sigura.

Asina mes, Lopez Tromp a bisa cu esaki tabata algo hopi peculiar na momento cu Aquannette A. Gun ta pidiendo e re-conteo aki na unda e no tabata referi na un otro persona, sino cu ta su mes cu eynan el a vota y e no a haya ni un voto.

“Como candidatonan riba lista, ta importante cada voto hasta den un proceso por ehemplo, si boso por saca bo mes como un politico, kiermen bo no por bisa sin mas cu el a bay pa e partido toch, e por a bay pa e partido pero pa cada candidato individual, cada voto ta conta”, el a expresa.

Di su parti, Aquannette A. Gun a presenta diaranson mainta na Hoofdstembureau hunto cu Lopez Tromp y a expresa cu el a dirigi algun preguntanan y un carta na presidente di Conseho Electoral, Glenn Thode.

Den su caso, Gun a splica cu e resultadonan di urna 29 a drenta te despues di 3or di marduga di dia 26 di juni ultimo y ora el a haci e pregunta: “dicon a mi como candidato no a ricibi ningun voto na e urna ey? mi ta haya como contesta cu mi no tin cu preocupa pasobra e voto a keda den mi partido, pero e no ta bay na base di esey e ta na base cu a bo como politico ta haci uso di bo derecho pa vota anto bo ta pidi nan pa haci re-conteo pero, segun e presidente ta indica, esey no ta un base suficiente pa nan por haci re-conteo”, Gun a sigura.

Na mesun momento, el a conta cu e mesun sentimento cu nan a sali for di e reunion di diaranson mainta ta cu tabata un formalidad pero practicamente segun Gun a menciona nan no tabata na ningun momento habri pa nan por reconsidera nan postura, “esaki ta hopi peligroso pueblo, pasobra nos ta bayendo den un direccion robes”, el a finalisa.

Di otro banda, den un process verbal di e reunion di Hoofdstembureau cu a keda conoci ayera, tanto Marisol Lopez Tromp como Aquannette A. Gun a keda den e lista di 21 persona cu por bira parlamentario di aña 2021 pa 2025.