(AP) – E gobierno di The Queensland y Western Australia a conseha riba diaranson pa personan bao e edad di 40 aña, no tuma e vacuna di AstraZeneca pa motibo di riesgo di un enfermedad raro di cuahulo di sanger, aunke e gobierno di Australia a haci e vacuna aki accesibel pa tur adulto.

E conseho di e gobierno di e estadonan aki ta basa ariba reglamentonan di e gobierno Britanico, aunke cu e gobierno federal nobo su posicion ta reconoce cu e scarsedad di e vacuna di Pfizer y cu tin un necesidad urgente di pone mas velocidad den e vacunacion di e pueblo.

E desacuerdo a trece confusion, den bista cu mita di Australia su populacion ta den ciere na Queensland, Western Australia, New South Wales y e Northern Territory, pa motibo di e gruponan di caso nobo, mayoria di e variante nobo delta, cual ta rumora di ta mas contagioso.

E cuidadanonan di Australia no tin otro opcion mas cu e dos vacunanan cu ta produci localmente, di cual AstraZeneca ta esun cu tin hopi mas disponibilidad.

Queensland su Chief Health Officer Jeannette Young a bisa cu ta mihor pa adultonan mas hoben warda pa ora cu e vacuna di Pfizer bira uno hopi mas disponibel, aunke solamente 5% di tur Australiano ta vacuna completamente.

Cu solamente 42 caso di coronavirus activo den Queensland, AstraZeneca no ta bal e riesgo den adultonan mas hoben, Young a comenta.

“No, mi no kier pa e personanan di edad mas abao cu 40 aña tuma e vacuna di AstraZeneca, pa motibo cu nan ta den un riesgo mas halto, cual aunke e no ta hopi comun, toch nan ta den un riesgo mas halto di yana in sindrome di cuahulo di sanger cu no ta comun.”, Young a elabora, agregando “mi no kier un persona di 18 aña den Queensland muri pa motibo di un enfermedad di cuahulo di sanger pa un vacuna di un virus, cual probablemente si nan lo haya e virus mes, no lo fayece.”

Australia su consehero di vacuna, Australian Technical Advisroy Group on Immunization, conoci tambe como ATAGI, a recomenda Pfizer pa personanan bao di 60 pa e mesun motibo di riesgo di cuahulo di sanger.

AstraZeneca a ser recomenda pa tur adulto te ora un señora Australiano di 48 aña a muri di cuahulo di sanger den april. Desde e momento aki e vacuna a ser recomenda pa personanan di 50 aña bay ariba, te ora cu un otro persona a di 52 aña di edad a muri den mei pa e mesun causa.

Mirando cu e preocupacionnan a crece tocante infeccionnan nobo, e gobierno federal a dicidi riba dialuna di haci AstraZeneca accesibel ta tur adulto y pa para tur demanda contra dokter nan cu ta administra e vacuna aki.

Western Australia Premier Mark McGowan a bisa cu su gobierno a tuma “un ruta diferente” na e gobierno federal.

“Personanan bao di 40 aña no lo mester tuma e vacuna aki” McGowan a declara, referiendo na AstraZeneca.

Minister di salud Greg Hunt a bisa cu e conseho di ATAGI ta continua siendo su gobierno su guia.

Sinembargo, ATAGI mes a conseha cu AstraZeneca por a ser duna na personanan bao di 60 aña, “pa kendenan Pfizer no tabata disponibel.” Condicionnan tabata inclui cu e beneficionan tabata hopi mas probabel di surpasa e riesgonan , y cu e decision di tuma y permiti personanan bao di 60 aña ricibi e vacuna di AstraZeneca tabata un decision informa.

“Nos ta profundamente respeta e hecho cu durante e curso di e pandemia, a tin hopi diferente opinionnan y informacionnan poni y publica, pero e elementonan critico tabata cu nos tin un programa nacional di vacuna, cual ta basa ariba e conseho medico y ta continua di ta basa ariba consehonan medico” Hunt a declara.

Hunt a nenga di revela si Australianonan mas hoben di 40 aña mester tin e expectativa cu e dokternan lo inyectanan cu e vacuna AstraZeneca.

“Mi nunca lo hinca mi mes entre un pashent y un dokter unda cu un informacion informa a ser tuma tocante e vacuna.” Hunt a bisa

Hopi Australianonan a demostra y expresa emocion y aceptacion pa cu e vacuna di AstraZeneca.