Despues cu presidente di Conseho Electoral Glenn Thode a informa cu re-conteo di votonan pa loke ta trata eleccionnan di siman pasa, no lo tuma luga, ayera mainta diferente lidernan di partido politico y representante legal tabata presente na e ‘hoorzitting’ di Censo.
Na e salida di e reunion, lider di partido PPA Transforma a duna un declaracion na medionan di comunicacion presente y a expresa cu e decision di Conseho Electoral di ayera mainta ta conclusivo, e resultado di eleccion a wordo determina y ayera mes a ser firma.
“Si, tabatin diferente preguntanan, tocante e validez di diferente ponencianan cu a wordo treci dilanti, dudanan cu tabatin den cierto cosnan, sinembargo nos a wordo duna un splicacion tambe”, Malmberg a señala.
Di parti di partido PPA Transforma, Malmberg a señala cu nan ponencianan ta cu nan mester por confia den e proceso, e proceso tin su caminda determina pa ley “mi ta kere cu nos ta mirando 72 urna caminda tabatin 72 presidente di urna, diferente personanan cu a traha den diferente urnanan casi 300 y pico mi ta kere, e proceso ta cla y di parti di PPA nos no por zomaar duda e integridad di e personanan cu ta traha eynanan sin e prueba contundente”, el a sigura.
Asina mes, el a bisa cu e Hoofdstembureau Aruba a determina cu no tin suficiente base, por tin duda di por haci erornan entre e mesun partido di un candidato pa otro, di parti di PPA nan ta acepta y nan ta honra, tambe el a comenta cu “no tin suficiente duda na e momentonan aki cu ta prueba contundente cu ta bisa cu Hoofdstembureau mester haci un re-conteo y nos di parti di PPA ta acepta esey”, el a finalisa.
