(AP) – Despues di dos crisis suicida durante isolacion pa motibo di e pandemia, Zach Sampson di 16 aña ta sinti hopi mas fuerte, pero tin e preocupacion cu su habilidadnan social no ta mescos cu antes.

Amara Bhatia a logra supera su depresion pa motibo di pandemia, pero e hoben ta sinti cansa y den un estado di neutralidad. Virgnia Shipp ta purbando di ahusta pero ta bisa cu bolbe bek na normalidad “no ta normal pa su persona”.

Despues di hopi luna di distanciamento social, atende scol online y otro restriccionnan, hopi muchanan ta sintiendo e peso di e pandemia y ta enfrentando hopi dificultadnan purbando di bolbe bek na normalidad.

Un aumento den atentado di suicidio y problemanan di salud mental den muchanan hoben a causa cu Children’s Hospital Colorado a declara un estado di emergencia den fin di mei, ora cu e departamento di emergencia y camanan di hospital a yena di muchanan suicida y otronan cu ta sufriendo di problemanan psikiatrico. Tipicamente, e departamento di emergencia su turnonan a bira casi dobbel den mei pa casi 20 ora, segun Jason Williams, un psicologo pediatra na e hospital den Aurora.

Otro hospitalnan di mucha ta enfrentando un reto hopi similar.

Den temponan tipico, e actividadnan cu ta compana e fin di aña escolar manera examennan final, fiestanan di fin di aña escolar, graduacionnan, busqueda di trabao pa vakantie, ta causa hopi stress pa te hasta e muchanan mas disciplina. Pero despues di mas cu un aña bibando cu restriccionnan di pandemia, hopi ta agota y simplemente “no tin hopi energia den e curpa y mente” pa por lidia cu e stress cu anteriormente tabata manehabel, Williams a agrega.

“Ora cu e pandemia a dal pa prome biaha, nos a wak un aumento den e casonan severo durante evaluacion di crisis”, mirando cu muchanan tabata sufriendo cu “henter nan munda colapsando nan dilanti”, Christine Certain, un consehero di salud mental cu ta traha cu Orlando Health’s Arnold Palmer Hospital For Children a declara. “Awo, cu e mundo canando atrobe y habriendo bek, nos ta pidiendo e muchanan pa haci un cambio extremo atrobe.”

Na algun hospital di mucha, casonan psikiatrico a keda halto durante e pandemia, mientras cu otronan a wak un aumento den temponan recien.

Na Wolfson Children’s Hospital den JAcksonville, Florida, e casonan den e departamento di comportamento pa muchanan den crisis di edad 13 bay abao ta aumentando desde 2020 y ta den caminda pa yega te cu 230 e aña aki, cual ta mas cu 4 biaha mas halto cu den 2019, segun e psicologo di e hospital Terrie Andrews. Pa muchanan mas hoben, e admision tabata mas cu 5 biaha mas halto cu lo usual compara cu aña pasa y a keda aumenta desde luna pasa.

Dayton Children’s Hospital den Ohio su admisionnan pa e departamento di salud mental a aumenta cu 30% desde juli 2020 pa e aña aki den mei, cu casi 1,300 caso. E hospital mester a busca e dobel di e cantidad di camanan cu nan tabatin pa 24, y mester a baha e edad minimo pa ricibi tratamento di 12 pa 9 aña di edad, Dr. John Duby, vice presidente di e hospital a revela.

“E demanda abrumante di servicio di salud mental pediatrico ta poniendo un presion inespera den facilidadnan pediatrico, cuido primario, scolnan y organisacionnan basa riba comunidad cu ta apoya y tin nan enfoke riba muchanan” Amy Knight, president di The Children’s Hospital Association.

Dr. Alison Tothy, director medico di e departamento di emergencia pediatrico na University Of Chicago’s Comer Children’s Hospital, a bisa su departamento di emergencia a wak muchanan den crisis diario desde aña pasa, batayando pensamentonan suicida, cortando nan mes y algun otro comportacion di daño na nan mes, depresion y agresion repentino. E departamento ta yuda stabilisa e muchanan y despues ta referinan na unda nan por ricibi tratamento.

“Famianan ta bin cerca nos paso nos ta, den cierto caso, e ultimo recurso. Tin un escasez di policlinica.” Tothy ta agrega. Mayornan ta bisa cu ta warda te hasta dos luna prome cu por logra haya un cita.

Den Florida, e espera pa tratamento di policlinica ta mas largo ainda, y hopi terapistanan no ta acepta muchanan sigura pa Medicaid, Andrews a declara.

Na Children’s Hospital Colorado, e departamento di emergencia su bishitanan pa problema di comportamento a aumenta cu 90% den april di aña 2021 den comparacion cu april di 2019, y a keda halto den mei. Aunke e rapidez cu e cual e casonan tabata drenta e departamento a baha, autoridadnan di hospital ta teme cu e casonan aki lo gara velocidad bek na momento cu scol continua.

Williams a comenta cu e problemanan cu e hospital ta tratando ta “den tur tipo di mucha” desde muchanan cu ya previamente tabatin problema cu nan salud mental cu a bira pio, te cu muchanan cu nunca no a sufri di nada prome cu e pandemia a cuminsa.

Manera hopi estado, Colorado no tin suficiente terapistanan pa muchanan y hobennan manera e demanda ta rekeri, cual tabata un problema te hasta prome cu e pandemia.

Muchanan cu mester tratamento di policlinica ta experenciando cu e ta tarda 6 pa 9 luna pa un cita. Y hopi terapistanan no ta acepta seguro di salud, lagando famianan cu no por paga e costonan for di nan mesun saco sin otro opcion. Tardansa den tratamento ta causa crisis cu ta hiba e muchanan den emergencia.

Esunnan cu ta mehora despues di tratamento psikiatrico na hospital pero no ta suficientemente recupera pa por bolbe bek cas, ta ser manda na otro estado pa por continua cu nan tratamento pa motibo cu den Colorado no tin hopi facilidad, Williams ta revela.

Sampson ta conta cu “tin hopi diferente cos” a causa su prome crisis den augustus. E hoben di Jacksonville, Florida a lucha hopi cu su educacion online y a pasa oranan largo den su camber ta hunga wega online y riba websitenan unda tabata trata topiconan scur cu “tabata haci mi celebro dolor”

El a revela su pensamentonan suicida na un amistad, cu despues a contacta autoridadnan. El a pasa un siman den hospital bao cuido psikiatrico.

Tur dos di su mayornan tabata traha den area nan cu tin di haber cu salud mental, pero nunca no a ripara cu nan mesun yiu tabata luchando contra esaki.

“Nos a ripara cu e tabata pasa hopi mas di su tempo den isolacion y no tabata haci hopi, pero nos tabata den un pandemia, hopi di nos no tabata haciendo hopi y tabata pasa mayoria di nos tempo den isolacion.” mama di e hoben, Jennier Sampson a comenta.

E hoben a cuminsa psicoterapia virtual pero den mei su pensamentonan destructivo pa cu su mes a bolbe bek. Camanan den hospitalnan psikiatrico tabata yen, causando cu e hoben mester a warda un siman den un camber di espera prome cu e por a ricibi su tratamento.

Awo riba medicina pa stabilisa su animo, e ta continuando su sesionnan cu su terapista, a caba scol y ta hopi emociona pa bolbe bek scol den persona. Sinembargo, e ta comenta cu te ainda e ta un tarea un poco dificil pa por motiva su mes pa sali for di cas pa bay gym of sali cu su amistadnan.