Ursell Arends lider di partido Raiz: “Nos no a reuni cu ni un hende ni cu ningun politico, ni prome cu eleccion ni te ainda despues”

Ursell Arends cu ta lider di partido Raiz, un di e partidonan chikito cu a haya mas voto y dos asiento den eleccionnan di diabierna ultimo 25 di juni, ayera mainta a tene un reunion cu gobernador Alfonso Boekhoudt pa loke ta trata e formacion di gobierno nobo.

Despues di e reunion di ronda di consulta, Arends a acerca periodistanan di diferente medio di comunicacion cu tabata wardando pa e diferente lidernan di partido y a comenta cu e ta gradici cu tur e confiansa cu 5.474 votado a pone den su partido pero cu e mes no por a celebra door di e fayecimento di e mama di su casa.

Asina mes, el a indica cu esaki ta nifica un cambio cu mester bin den politica na unda nan a traha duro durante ultimo cuatro aña cu a caba cu 12 candidato riba e lista cu awor door di confiansa di comunidad nan ta cla pa sinta y asumi nan responsabilidad.

“Desde nos inicio Raiz a para pa integridad y e fundeshi di integridad pa nos, ta democracia”, Arends a señala.

Tambe, el a sigura cu nan ta respeta cu pueblo a pidi pa un coalicion y nan tambe tin cu respeta esey, el a sigura cu durante fin di siman yen di noticianan y rumornan a core rond na unda el a enfatisa cu “Raiz no ta forma parti di ningun complot, nos a bisa for di inicio cu nos lo duna contenido, duna espacio pa proceso formal cana y canalisa”.

Durante e fin di siman ultimo el a menciona cu full partido Raiz tabata informa cu e lo a tuma dos dia liber pa acompaña su famia na e momentonan dificil cu nan ta atravesa pa loke tin di haber cu e perdida di un ser keri na unda cu a keda sigura cu Raiz no a participa den otro actividad “ni ningun complot”.

Arends ta kere cu mester yega na negociacion pa wak si tin e posibilidad di yega na un areglo di gobernacion “Raiz no ta yega tuma decision na base di emocion, nos ta tuma decisionnan na base di contenido y si e posibilidad t’ey pa yega na coalicion cu cualkier partido, nos mester negocia esaki pa tene na cuenta cu e puntonan cu Raiz a presenta den su perspectivanan”, el a declara.

Di mesun manera, Arends a enfatisa cu partido Raiz no a reuni cu ningun partido prome cu eleccion, manera algun rumornan den comunidad tabata sigura.

“Raiz a haci campaña, nos a haci nos tarea, nos no a reuni cu ni un hende ni cu ningun politico, ni prome cu eleccion y te ainda ni despues di eleccion”, el a finalisa.