Ayera Registro Civil y Censo di Aruba a publica e lista individual preliminar di voto pa cada partido, y den esaki a destaca un cambio entre e politiconan cu a ricibi e mayor cantidad di voto den ultimo eleccion.

Mester destaca cu ta trata aki di un lista preliminar, y e lista oficial confirma lo wordo publica diasabra awo. Sinembargo, den e cifranan preliminar ya por nota cua candidatonan a destaca den votacion. Na prome luga, lider di MEP, Evelyn Wever-Croes a rciibi 7518 voto. Na segundo luga, lider di AVP, Mike Eman a ricibi 6668 voto, y na tercer luga, lider di MAS, Marisol Lopez-Tromp a ricibi 4191 voto.

MEP
 Manera ariba menciona, prome minister demisionario y lider di Partido MEP, Evelyn Wever-Croes tabata e candidato cu a ricibi mas voto, cu 7518. Na segundo luga den su partido tabata Dangui Oduber cu 2060 voto y na tercer luga Glenbert Croes cu 1929 voto.

AVP
 Pa e partido berde, ta lider Mike Eman a ricibi e mayor cantidad di voto, cu 6668. Na segundo luga den su partido tabata Gerlien Croes, cu 1919 voto. A pesar di ta implica den un caso penal y ta actualmente deteni pa autoridadnan,na di tres luga cu 1614, ta Benny Sevinger.

MAS
 Den partido MAS, lider Marisol Lopez-Tromp a ricibi casi tur voto pa su partido, esta 4191 (di e total di 4681 voto cu MAS a ricibi). Na segundo luga den su partido a keda Solangel Dinmohamed cu 189 voto, y na di tres luga Aquannette Gunn cu 77 voto.

RAIZ
 Lider Ursell Arends a ricibi 1939 voto, sigui pa Geoffrey Wever cu 1430 voto, y Raymicheline Raymond cu 693 voto.

Accion21
 Lider Miguel Mansur a ricibi 2019 voto, mientras nr 2 di e partido, y parlamentario saliente, Daphne Lejuez a ricibi 500 voto. Na tercer luga cu 190 voto ta Leonardo Figaroa.


RED
 Den partido Red, similar na partido MAS, lider Ricardo Croes a ricibi un porcentahe hopi halto di e voto, cu 1184. Sigui pa Minister demisionario Armando ‘Rudy’ Lampe cu 170 voto y Kinasha van der Bliek cu 114 voto.

POR
 Den partido POR, lider Alan Howell a ricibi 353 voto, sigui pa R.M.F. Sint Jago cu 57 voto y P.E. Kock cu 46 voto.

PPA
 Lider di Partido PPA, Lisette Malmberg a ricibi 943 voto, sigui pa Natalie Geerman cu 186 voto y na tercer luga cu 85 voto Michelle Brooks.

CURPA
 Pa partido Curpa, Eric Ras a ricibi 202 voto, sigui cu 35 voto pa A. E. Tromp y 23 pa M.R. Robert.

HTC
 Den partido HTC, Gilbert Webb a ricibi 154 voto, sigui cu 29 voto pa Jessica Wernet y 28 voto pa Latoyer Briggs.

E listanan preliminar completo pa cada candidato di cada partido lo ta disponibel den nos proximo edicion.