Entre ayera, awe y mañan diferente lider di partidonan politico y instancianan lo tin ronda di consulta cu Gobernador di Aruba Alfonso Boekhoudt pa loke ta trata e formacion di e gabinete nobo di gobierno pa e proximo cuatro aña.
Ayera dialuna den oranan di mainta, presidente di Raad van Advies Frits Goedgedrag den un declaracion pa medionan di comunicacion a splica cu e entidad aki ta consehero importante di gobierno y nan rol den esaki ta cu nan ta duna gobernador riba su peticion e opinion di nan tocante kico lo mester sucede, si ta bin un informado of un formado, riba kico nan lo mester concentra riba nan mes.
“Asina cu eleccion a tuma luga diabierna ultimo nos a bini hunto como Raad van Advies y den dje nos a duna nos opinionnan over kico gobernador lo por papia den consulta cu e lidernan politico, kico nos a discuti, esey ta keda entre gobernador cu a mi”, Goedgedrag a sigura.
Di mesun manera, el a manifesta cu e no por divulga loke den reunion cu gobernador a wordo papia y lo cual nan ta haci conseho consultativo ta pa ora nan ta haya un peticion nan ta duna conseho riba esey, “de bes en cuando nos ta duna te hasta conseho sin cu a puntra ora cu tin cos den comunidad cu nos a haya, cu mester duna nos opinion, pero no aworaki” Goedgedrag a finalisa.
Seguidamente Gobernador lo consulta lidernan di partidonan politico y despues presidente di Sociaal Economische Raad, señora Tisa LaSorte, cu presidente suplente di Algemene Rekenkamer, señor Frederick Nuboer y cu e miembro postula pa Aruba di College Aruba financieel toezicht, señora Hellen van der Wal.
E consultanan ta forma e comienso di e proceso di formacion pa yega na un gobierno nobo pa Aruba. Ta spera cu e consultanan ta finalisa riba diaranson 30 di juni. E siguiente paso den e proceso di formacion ta cu, a base di e resultado di e consultanan, lo designa un informador y lo formula e encargo pa e persona en cuestion.
