Ryçond Santos do Nascimento, candidato di partido AVP: “E cantidad di voto invalido den eleccion aki, ta e cantidad mas halto den historia di nos como pais Aruba”

Den un entrevista cu Bon Dia Aruba, e candidato number 5 riba lista di partido AVP, Ryçond Santos do Nascimento a expresa cu su partido henter dia di ayera tabata recolecta firma pa haci re-conteo di e votonan invalido y cu nan ta dispuesto pa participa den un gobernacion.

Do Nascimento a splica cu partido a tene un reunion diadomingo ultimo na unda nan a tuma e decision cu nan lo bay pidi un re-conteo di votonan pa diferente motibo, e principal ta cu e cantidad di voto cu a wordo kita di votonan invalido ta yega na mas di 800, “e cantidad mas halto den historia di nos como pais Aruba”.

Den eleccionnan di diabierna ultimo, e resultado ta señala cu MEP a saca 7 asiento mas 2 restzetel a bira un total di 9, mientras cu AVP a saca 6 asiento mas 1 restzetel, MAS a haya 2, Raiz a haya 2 y Accion21 a haya 1, di esaki el a bisa cu ta combina na e hecho cu tabata falta un tiki mas cu 50 voto pa e restzetel di partido AVP cu lo a hiba e reparticion di asiento na 8-8 pa e dos partido grandi.

Otro motibo ta cu nan tabatin un caso den Corte di Husticia net prome cu eleccion lo a tuma luga unda cu nan a pidi e kiesregister na minister pa hues otorga nan e decision, pero manera el a sigura minister a dicidi di duna un interpretacion na e sentencia cu no ta cuadra cu e manera con e sentencia a wordo construi ni cu e manera cu esey a bay.

“E proposito di e kiesregister ta cu por tin un control externo di e proceso di eleccion y lo cual nan a otorga ta un lista cu practicamente bo tin e stemdistrict y e fam, bo no tin ningun manera di controla”, do Nascimento a enfatisa.

Esaki tambe ta di acepta e cantidad di chekernan disponibel pa por check den e forma ey tambe y cu esey a influencia e manera con eleccion a bay, cu no tabatin control y lo cual ta agrava e tema ta cu no tin control internacional tampoco den e sistema di eleccion, manera el a declara.

E reunion na Cas di Partido na Playa di diadomingo tambe tabata pa nan discuti e resultado di eleccion na unda nan ta kere cu pueblo a duna un “señal cla” y cu aworaki mester laga e proceso tuma su curso, esey ta nifica cu manera con e sistema ta na e momentonan aki, gobernador ta esun cu ta guia y ta coordina e formacion di gabinete nobo.

Ademas, di esey do Nascimento a comenta cu tin un espacio special pa e partidonan chikito como Accion21, MAS y Raiz cu hopi hende a vota pa nan y esey ta un señal di comunidad.

E postura di partido AVP segun do Nascimento a splica ta cu tur di nan ta dispuesto pa participa den un gobernacion, nan ta dispuesto pa traha hunto pero, “nos mester laga e proceso aki tuma su rumbo manera debe ser y esey ta nifica cu gobernador ta bay sondea ki ta e posibilidadnan”, el a afirma.

Den un declaracion cu prome minister demisionario Evelyn Wever-Croes a ofrece pa un medio di comunicacion local, el a señala cu e ta dispuesto pa traha cu tur partido menos cu un, cu ta AVP pa motibo di ideologia distinto y cu AVP ta brasa corupcion, pa cu esaki, do Nascimento a trece dilanti cu “si bo ta participa den eleccion ta hustamente pa bo traha pa un pais y pone interes di pueblo na prome luga”.

E proceso electoral aki ta pa parlamento manera do Nascimento a sigura, pero awor nan sa mas o menos con e constelacion nobo di parlamento lo ta y na prome luga ta importante cu nan tin representacion na parlamento, cu eynan nan a traha na interes di pueblo y specialmente “partido AVP ta sinti su mes yama pa para pa esunnan cu ta mas debil den nos comunidad, esunnan cu ta sinti nan mes marginalisa”, el a declara.

Asina mes, el a sinti su mes contento con e eleccion cu a tuma luga un biaha mas, unda cu pueblo a haya oportunidad pa expresa su boluntad y tambe e ta contento cu tin e hermentnan den e sistema pa por ta critico cu ta hopi importante, “si bo no tin e parti ey, e ora e sistema tin tendencia di degenera, esey ta e esencia y ta importante pa cada partido tuma su responsabilidad y mi speransa ta pa nos tur traha hunto pa hiba nos pais dilanti y tambe nos traha hunto pa subi nos nivel di politica na Aruba”, el a finalisa.

Mr. dr. Ryçond Santos do Nascimento ta docente di derecho constitucional, na 2009 el a cuminsa traha na Universidad di Aruba, desde 2020 e ta duna les na University of Curaçao y desde 2021 tambe na University of the Dutch Caribbean.