Marisol Lopez Tromp lider di partido MAS: “Mi por sinti si cu e resultado aki ta hopi miho cu e ultimo eleccion”

Partido MAS cu su lider Marisol Lopez Tromp diabierna ultimo cu tabata dia di eleccion a haya 4.681 voto den e 72 urna, loke ta nifica tambe cu el a logra dos asiento pa e gobierno di e proximo cuatro aña, dependiendo di con esey lo tuma luga.

Bon Dia Aruba a tuma contacto cu Lopez Tromp pa haci un par di preguntanan di loke ta referi e resultadonan di eleccionnan di diabierna ultimo, si e tabata spera e resultado cu el a haya por ehemplo, y kico e ta kere ta e mensahe cu el a haya y cu su votadonan a manda pa otro partidonan.

El a conta cu ta increibel, e manera con e partido a wordo traspasa na su persona y el a mester entrega e lista di candidatonan den apenas dos siman, “lo cual ta algo abnormal” el a declara.

Cada partido tin su tempo y te hasta lunanan pa por haci nan lista di candidato y desde e momento cu partido MAS a entrega su lista na Censo y nan a haya nan firmanan, otro seis siman a pasa, “eigenlijk e campaña mes a dura bo por bisa seis siman pa por a logra e dos asiento”, el a splica.

Asina mes, el a papia cu e nunca a corda cu ningun un otro partido a pasa den un cos manera esaki y cu nan ta hopi contento y hopi satisfecho cu e cantidad di voto y asiento cu nan a haya den tur e cantidad di urnanan, algo cu pa su persona ta nifica cu esey ta un potencial pa crece.

Di loke ta e resultado di dos asiento, Lopez Tromp a sigura cu e ta sinti cu e campaña a bay bon, e acogida tabata bon, aunke e tempo di campaña tabata hopi cortico, tabata duro y cu hopi peso pa cumpli cu e peticionnan como reunion di contacto, bishita etc, el a comenta cu el a haya un bon acogida.

“Mi no tabata sa precies den cuanto asiento esey lo a culmina, pero mi por sinti si cu e resultado aki ta hopi mas miho cu e ultimo eleccion”, Lopez Tromp a expresa.

Di e mensahe cu el a haya di su votadonan, Lopez Tromp a señala cu “bo por hiba un campaña basa riba programa di partido realistico, sin cu bo tin sponsornan cu ta bou campaña grandi y cu hopi material”, ademas, el a sigura cu nan a hiba un campaña hopi simpel, cu nan no a parti material, loke e comunidad por a mira ta loke e hendenan mes a traha y ta p’esey cu tabata diferente, ademas cu tabatin un tempo cortico di seis siman.

“Tempo tabata cortico pero nos a hiba un campaña dirigi pa anti-corupcion, na bienestar di nos hendenan, respet pa nos leynan y enfoke riba salud, educacion, social, husticia y combati corupcion, mi ta kere e votadonan a compronde e mensahe aki tambe”, el a manifesta.

Tambe Bon Dia Aruba a puntra pa Lopez Tromp kico a hunga un rol cu hende a kere den dje atrobe, pa motibo cu el a baha na 400 voto tempo di POR, pa esaki el a contesta cu e no ta kere cu den eleccionnan anterior nan no tabata kere den dje, e problema cu el a haya den ultimo eleccion di 2017 ta cu mayoria di cas cu el a bishita ora cu e tabata riba lista di partido POR, e campaña tabata hopi critico riba ex-minister Otmar Oduber.

“E mayoria di cas cu nos a bay tabata sinti un rechaso, un critica of un zundramento riba Otmar den tempo ey”, tambe el a sigura cu nan tabata tuma nan tempo pa splica of pa contesta ora cu e hendenan tabata trece esey pa dilanti “esey ta un diferencia hopi grandi cu e eleccionnan aki”.

Manera comunidad a conoce, dia 22 di april ultimo Holmo Henriquez ken tabata e antiguo lider di partido MAS a haci e traspaso di e liderazgo y presidencia di e partido pa Lopez Tromp dilanti di edificio di Camara di Comercio, na e momento ey Henriquez a splica cu den e traspaso no tabatin nada di compra, of huur, pero cu tur cos a bay segun statuutnan, y den pleno aceptacion di banda di e directiva existente.

Segun e lider nobo Lopez Tromp, e no a yega sin mas na scoge pa partido MAS. E no tabata contempla bay cu ningun otro partido prome cu el a yega na e escogencia aki. Su escogencia ta basa riba filosofia di MAS cu ta cuadra cu loke Marisol Lopez Tromp tambe ta vocifera.