Loke nos a anticipa pa algun luna, ya a pasa caba. Eleccion ta tras di lomba y bida ta sigui. Bida politico tambe; e cartanan ta baraha y riba mesa. Loke nos ta haci awor ta contempla kico ta e posibilidadnan, a base di e acuerdo cu Hulanda. Di e partidonan cu lo ta den Staten ta e partido grandi actualmente den oposicion so cu ta mustra bastante critico riba e acuerdo cu Hulanda. E pregunta mesora ta kico nan ta kere cu nan por cambia ainda na e acuerdo ey, cu ta bay ta e linea cora den e proximo gobernacion aki. Esey lo no ta otro si ta e partido berde lo ta den gobierno. Pero e probabilidad ey ta hopi remoto, y ban wak e posibilidadnan real promer.

Na promer lugar tin dos partido cu tin dos asiento, y cu e nuebe asientonan di e partido grandi den gobierno demisionario esey teoricamente ta duna suficiente base pa un gobierno di coalicion cu minimo 11 voto di apoyo den parlamento. Sin embargo, conociendo e historia parlamentario un poco, nos ta kere cu lo tin un yamado pa logra un base un poco mas amplio pa e gabinete, loke ta encera inclusion di un di e otro partidonan, sea cu un o dos voto. Con esaki ta bay resulta no ta cla ainda, sigur pasobra nos sa cu tin ‘bad blood’ ainda entre e actual promer ministro y e ex-ministro cu e mes a yuda pone un banda. Sin embargo, lo por tin un momento cu ambos lo realiza cu tin mas asunto pa contempla cu sentimento personal, pa fuerte cu nan por ta.

Mientras cu e otro partido cu dos asiento e negociacion por ta parce mas facil, pa e ausencia di e sentimentonan negativo ey, nos no ta kere cu esey lo ta asina tampoco. Al fin y al cabo, ora cu pone tur sentimento un banda, hasta esunnan posittivo, ta keda e tarea di crea un programa di gobernacion cu cual tur mester por biba. Naturalmente tin e acuerdo cu Hulanda cu ta duna un base fuerte di con cosnan mester bay, den cada ministerio ta keda un sinfin di asunto pa acorda, cu por bay percura pa bataya fuerte pa por yega na acuerdo. Den esey ta importante no solamente e contenido di maneho di cada ministerio, sino tambe e estilo di goberna di e partido grandi cu tabata blanco di critica di practicamente tur e partidonan chikito, esunnan den parlamento proximamente sigur. Y esey ta un punto cu nos a trece dilanti na varios ocasion tambe, cu e gobierno saliente tabatin critica fuerte riba e gobierno anterior na nan, riba e tema di corupcion y falta di integridad, pero no a mehora nada den e forma di goberna pa preveni corupcion actual y den futuro. Laga nos ta bon cla den esaki: caso Flamingo a surgi durante e gobierno actualmente demisionario, a tapa e asunto un poco cu e salida oportuno di e sospechoso principal como ministro, pero e medidanan cu e siguiente ministro kier a tuma, a topa cu resistencia grandi pasobra, den nos vision, e partido actualmente celebrando su ‘victoria’ cu a resulta den perdida di mas di mil voto, practicamente no tin ningun inclinacion interno pa mehora cos den gobernacion. Casi ningun mehoracion mayor di ultimo decadanan a yega di tuma lugar bao di nan gobierno(nan), y den e ultimo casi cuatro añanan aki tambe nos ta mira e mesun seyo di, manera nan ta bisa na Hulandes, “pappen en nathouden”.

Un bon ehemplo ta con ta maneha e asunto di reforma fiscal, unda di banda Hulandes y di IMF nos a tende mas cu di e propio ministerio mes, y esey no tabata den campaña so, pero den henter e trayecto desde 2017. Mientras tabata usa cu regularidad e palabra ‘transparencia’ nos no a mira realmente un cambio den e practica di semper. Y pakico esaki a bay asina? Fuera di cu ta reina un ambiente interno unda ta kere cu ‘esnan eyfo no tin nada di sa ni bisa’ ta hunga un papel importante e afan pa no cambia nada, si no ta absolutamente necesario. Awor, e acuerdo cu Hulanda lo bay trece cambio, y tin di nan lo ta drastico, unda e opinionnan dentro di e gabinete lo diferencia, sigur ora e forzanan conservador den e partido grandi cuminza mustra diente atrobe.

Y, ora finalmente yega na reparti cartera di ministro, lo yega e momento tambe cu mester papia di e famoso 25 persona cu cada ministro den e actual gabinete demisionario tabata haya necesario pa por funciona. E mihor ehemplo cu esey ta nonsense tabata e salida di 6 persona for di despacho di ministro encarga cu Salud, cu a haya un carera nobo, y ohala cu mas actividad real, como chauffeur pa nos ciudadanonan cu mester bay dialyse. Ningun ministro mester di 25 ‘asesor’ y mayoria di e empleadonan aki no ta cay den e categoria ey, sino di ‘werkverschaffing’ di famia y amigo. Nos sa cu lo bay grita cu e anterior gobierno (2009 – 2017) tabata mas desastroso ainda, pero esey no ta argumento mas. Esaki ta momento clave pa avanza como pais y ta momento pa mustra cara. Pueblo kier mira un cambio, no den eleccion so, den gobernacion tambe desde awe.