(AP) – Tesla ta recall alrededor di 285mil vehiculo electrico na China pa motibo cu e funcion di cruise-control por wordo activa accidentalmente y causa cu autonan ta acelera diripiente, loke ta un peliger pa seguridad, segun autoridadnan Chines a bisa diasabra ultimo.
Den un mensahe na clientenan riba e plataforma di red social Chines, Weibo, Tesla a bisa cu ‘tin potencial riesgo pa seguridad den casonan extremo’.
Regulador di mercado di China a bisa cu e recall ta cubri 211,256 sedan Model 3, y 38,599 vehiculo di utilidad compacto Model Y, cu a wordo construi na China, y 35,655 Model 3 cu a wordo importa. E autonan a wordo produci entre december 2019 y e luna aki.
E regulador a bisa cu Tesla tin plan pa mehora software di cruise-control riba e vehiculonan di forma remoto, loke lo spaar e doñonan e tarea di hiba nan auto na un tienda di e compania. A bisa cu Tesla lo tuma contacto cu clientenan si no por drecha nan auto di forma remoto.
Administracion Estatal di China pa Regulacion di Mercado a bisa cu bao cierto condicionnan, chauffeurnan accidentalmente por activa cruise control. Si e auto ta biahando mas slow cu e setting di cruise control, e auto lo acelera, y ‘den casonan extremo’ por causa un accidente.
E regulador a bisa cu subsidiarionan Chines di Tesla a tuma contacto cune ‘algun dia atras’ pa solicita un recall.
Tesla Inc., basa na Palo Alto, California, no a responde na mensahenan solicitando comentario. E compania a enfrenta retonan anterior na China, incluyendo acusacionnan di mal trato di cliente. Na april, un cliente a protesta na un show di auto cu brake a faya riba e Tesla di su famia, causando un accidente cu a manda su mayornan hospital. Despues di inicialmente culpa e chauffeur, Tesla a duna un disculpa publico na e cliente infeliz y a priminti di siña di e incidente.
