Na Scol Washington, ayera mainta lider di partido Accion 21 Miguel Mansur a duna un declaracion pa medionan local presente prome cu e lo a drenta na urna pa deposita su voto.
El a duna di conoce cu tabata hopi optimista, cu “nos ta cla pa cuminsa traha, cla pa hiba Aruba dilanti y realmente hopi gradici pa e apoyo cu nos a haya pa partido y pa nos candidatonan”.
Manera ta conoci, Accion 21 ta un di e partidonan nobo pa eleccionnan di e aña aki, Mansur a expresa cu e campaña a bay hopi bon den e tempo cu nan partido a haya y cu nan a completa, e plan di partido manera el a sigura ta esun di mas solido y cu mas solucion cu tin, “realmente nos tabatin plan pa bishita tur cas pero nos no a yega y nos a purba di comunica y ricibi e mensahe di tur hende, nos tur ta cla pa progreso, cla pa solucionnan y cla pa hiba Aruba dilanti”.
Asina mes, el a comenta cu e ta sperando un sorpresa grandi, cu tur e dos partidonan grandi lo bay atras y ta kere cu nan ta bon posiciona den e partidonan nobo pa realmente trece sorpresa y cambio, ademas, el a bisa cu e necesidad cu e mas ta mira den pueblo ta e necesidad financiero, “p’esey ta hopi importante pa nos bin cu un reforma fiscal, pa nos revitalisa nos economia, a mi semper ta bisa, entradanan di pais di Aruba ta suficiente pa tur hende por tin comodidad financiero y nos no ta bibando esey pa via di mal maneho den ultimo 20 añanan pa via di e dos partidonan grandi y awe esey ta caba”, Mansur a expresa.
Mansur a informa tambe cu si nan lo gana algun asiento, nan ta cla pa traha cu otro partidonan, “gobierno di Aruba ta un gobierno di principio y no di personalidad, realmente nos lo traha cu partido cu ta sostene e Landspakket, cu ta sostene nos reforma fiscal y ta sostene igualdad”.
