Prome Minister Evelyn Wever a yega Maria Colege pa eherce su derecho di voto compaña pa un cantidad grandi di personanan apoyando su persona.
Na momento di su yegada Evelyn Wever Croes a ser ricibi pa un cantidad grandi di persona cu ta apoya y sostene su persona y partido MEP. Pero tambe pa medionan di comunicacion.
Prome minister a para un momento y a duna e oportunidad di haci su persona algun pregunta, oportunidad cu miembronan di prensa a tuma inmediatamente. Un di e miembronan di prensa presente a puntra Wever Croes pa locual ta trata cu e condicionnan cu Hulanda a pone pa cu Aruba, pregunta cu minister a contesta bisando “e ta asinakinan cu nos a tuma e actitud di sinta na mesa, dialoga y nos a negocia lo mas tanto cu ta posibel. Nos a logra pa e di 3 kwartaal sigura e fondonan pa juli, augustus y september 181 miyon florin.”
Wever Croes a elabora riba e uso di e suma aki di 181 miyon florin. E suma aki lo ser usa pa sigura e pago di salario, pago di vakantie-uitkering, cual mita lo ser paga e siman aki, pago di fase y pago di subsidio di salario, cual segun e minister lo trece trankilidad y stabilidad na e pueblo.
Miembro di prensa a trece dilanti tambe cu den caso di un coalicion, cu cual partidonan MEP lo sinta pa asina conhuntamente forma un gobierno, pa cual minister Evelyn a declara cu e partido di MEP “ta habri pa traha cu cualkier partido si pueblo dicidi cu ta un coalicion ta bay tin.” Sinembargo, AVP ta e unico partido cu MEP lo nenga di traha cune, pa motibo cu MEP “ta para pa integridad, nos ta combati corupcion y partido di AVP ta un academia di corupcion.”
A toca tambe e punto di inseguridad den e cierto persona den e pueblo cu te ainda no sa na ken duna nan voto, pa kendenan Wever Croes a haci e pregunta: “con boso ta haya cu nos a maneha e pandemia? Si bo ta haya cu nos a atende bon cu e pandemia, duna nos un oportunidad pa nos por continua cu e trabao y saca Aruba di e pandemia di berdad.
