Casa di ex-minister y parlamentario Benny Sevinger, Claudia Sevinger a deposita su voto na St Franciscus College na Madiki, na unda el a yega acompaña di lider di Partido Mike Eman, sostenedonan di partido berde y su famia mes.
El a duna di conoce pa medionan di comunicacion presente cu aunke e eleccion di aña aki ta uno diferente pa motibo cu su casa ta deteni na KIA como sospechoso di e caso Avestruz. E experiencia tabata uno dificil pa motibo cu nan ta custuma di bay vota cune. “E no t’ey cu su presencia, pero e ta cu nos den nos curason. Y nos ta haci un lucha hopi fuerte pa saca e campaña dilanti y nos ta hopi positivo. Nos ta bay lucha pa e inhusticia caba”.
Di mesun manera, el a dirigi algun palabra na personanan cu te ayera no tabata sa pa ken lo duna nan voto y el a expresa cu nan mester “bay vota pa lucha pa esaki caba, nos mester lucha pa saca Aruba dilanti”.
Yiu muhe di ex-minister Sevinger, Stephany Sevinger cu tambe tabata acompaña su mama na e momento aki, a bisa cu su expectativa tabata hopi positivo. “Nos ta wak hopi movecion riba caya anto esey ta pone nos hopi contento. Y manera boso por wak, Benny tin un sosten hopi enorme y esey no a caba e biaha aki, si e t’ey of e no t’ey nos ta sigui”, el a declara.
Mike Eman, lider di partido AVP a comenta cu nan a yega hunto pa duna e pueblo e sentimento cu e dia di vota ta un dia importante y “ta e dia tambe cu nos ta scoge e rumbo di nos pais, pueblo ta bayendo masal na urna electoral y pueblo lo kier un cambio, tin hopi sufrimento y hopi pobresa den nos pais y awe mas cu nunca nos mester di un cambio”.
Nan ta espera cu nan por haya un mandato hopi cla y ademas el a duna di conoce cu si e logra di haya un asiento e ta bay parlamento, el a splica cu ta importante “pa haya un parlamento di otro nivel caminda cu no lo ta simplemente polarisa y motibo ey tambe ta cu ken ta drenta parlamento mester busca un otro forma pa haci parlamento den futuro, pero nos expectativa ta cu nos ta sinta den gobierno” Eman a manifesta pa Bon Dia Aruba.
