Segun Jacobs, el a ricibi pregunta si den e datonan cu Svb ta administra por nota algun señal di recuperacion laboral. “Svb ta nota señalnan di recuperacion basa riba tres area cu Svb ta administra.” Esakinan ta areglo di subsidio di salario; desaroyo den e fondo di cesantia; y e cantidad di trahadonan registra pa seguronan di malesa y accidente.

Pa loke ta trata areglo di subsidio di salario, ‘nos ta nota cu di januari te cu fin di mei, e suma cu ta keda otorga na subsidio di salario ta baha’. Jacobs a splica cu pa un compania por bin na remarca pa subsidio di salario, primeramente e mester a keda impacta pa e medidanan cu gobierno a tuma pa contene e pandemia. Ademas e perdida di benta mester ta mas cu 25%. Na momento cu e perdida ta menos cu 25%, e no ta cualifica pa subsidio di salario. Na momento cu e suma cu ta pagando na subsidio di salario ta reduciendo, ta un indicacion cu e perdida economico di e companianan tambe ta bahando y tin di nan cu a pasa bao di e 25% di perdida.

Ademas Jacobs a informa riba e top 3 sector economico cu ta ricibi mas di 80% di subsidio di salario, cual ta (A) acomodacion y servicio relaciona cu alimentacion (hotel y restaurant). E segundo ta (B) benta por mayor y detal, y drechamento di vehiculo di motor (tienda); y e tercer (C) ta arte, entretenimento y recreacion. Tur esakinan ta depende hopi riba turismo. Si mira e desaroyo di subsidio di salario otorga na cada sector, por mira cu di januari pa mei, e pago na sector A a bay di Afl. 12.3 miyon na Afl. 5.6 miyon; sector B a bay di Afl. 3.5 miyon na Afl.3 miyon; y sector C a bay di Afl. 2.2 miyon na Afl. 1.6 miyon. Segun Jacobs, esaki ta indica cu e cifranan ta indica cu Sector A ta recuperando su benta, y ta spera cu e pago di subsidio di salario cu lo mester duna e sector aki pa luna di juni lo ta menos ainda. Ademas esaki ta indica cu e perdida di benta ta reduciendo, indicando cu tin mas benta y alabes esaki ta un indicador di recuperacion economico.

Fondo di Cesantia

Fondo di Cesantia tambe ta un indicador importante, segun Jacobs. Na momento cu un compania ta bay retira un trahador, y e trahador no tin culpa na dje, ta yega na un areglo di pago y e compania mes ta regla e cesantia. Sinembargo tin otro situacion cu por presenta den cual por ehemplo un compania ta bay bancarota. Den e caso aki e trahado tin derecho por pasa Svb pa haci apelacion pa haya su cesantia for di fondo di cesantia.

Segun Jacobs, na comienso di e pandemia a anticipa cu cos lo bay hopi malo cu e fondo di cesantia. A spera un demanda grandi pa e beneficio di cesantia. Den esaki a nota cu na aña 2020, a entrega y procesa 82 peticion pa cesantia, cu tabata pertenece na tres compania. Y Svb a paga 934mil florin na cesantia. “Sigur un cifra cu a sorprende nos. Pero di otro banda tin cu bisa cu e programanan cu gobierno a implementa pa sostene e companianan tambe a duna un contribucion”, Jacobs a indica.

Pa aña 2021 te cu dia 21 di juni ultimo, tabatin 56 peticion di cesantia entrega y procesa, esakinan relaciona cu seis compania. Pa esaki, Svb a paga 301mil florin.

Loke nan tin pendiente pa procesa ta 56 peticion pa cesantia cu ta relaciona na seis compania (‘eynan mi ta kere tin un fout’), y ta calcula cu e pago aki lo bira 354mil florin.

Jacobs a indica cu e cifranan no ta duna un tendencia preocupante pa cu e fondo di cesantia. “E cantidad di peticion a keda relativamente hopi abao compara cu loke nos a premira pa e aña aki na luna di december.”

Seguro di Malesa y Accidente

E siguiente indicador cu a usa pa por determina si ta papia di recuperacion, ta e cantidad di trahador inscribi pa e seguro di malesa y accidente. Segun ley, tur trahador den sector priva mester ta sigura pa e dos seguro aki. Segun ley, dunador di trabao mester percura pa riba e prome dia di trabao, e trahador ta inscribi pa e seguro di malesa y accidente.

For di maart aña pasa a nota un reduccion den cantidad di trahado sigura na Svb, pero desde maart di e aña aki a nota cu e tendencia a bolter, y e cantidad di trahado a cuminsa aumenta. “Mita di juni ta mira cu e cantidad di trahadornan a surpasa esun di april y mei.”

Jacobs a indica cu un trahador por traha na varios caminda, pa loke e ta sigura na varios luga, y den esaki tambe a nota un aumento. Igualmente Jacobs ta premira cu den esaki lo tin mas aumento pa resto di aña.

Riba nan proyeccion pa fin di 2021, riba e base cu dia 19 di juni ultimo tabatin 36,061 trahador registra, ta calcula cu lo tin 41,556 trahador registra pa e seguronan di malesa y accidente, loke ta representa un aumento di 8.4 porciento.

E cantidad di trahado registra na inicio di pandemia, fin di februari aña pasa, tabata 41,623 trahado. Na februari ultimo a registra e cantidad mas abao di trahador sigura cerca Svb, cu 38,259.

“Pues e cifranan ta mustra un crecemento den cantidad di trahadornan sigura pa Svb. A base di e indicadornan aki, nos ta constata e señalnan pa un recuperacion di Aruba”, Jacobs a finalisa.