(Lapatilla) – E number dos di e regimen Chavista y encargado di e reforma hudicial ordena pa e regimen, Diosdado Cabello, a indica cu a descubri casonan di corupcion hudicial y a anuncia cu lo cuminza atende esakinan.
“Esaki ta parti di e critica y autocritica di nos, nos a descubri nivelnan di corupcion hudicial cu mester atende (…) a dolariza servicio cu mester ta gratis,” Cabello a bisa den su programa Con el Mazo Dando.
Cabello, presidente di e comision cu lo “haci un revolucion hudicial”, a añadi cu e ta spera di cuminza diabierna (awe) cu bishita “na tur centro penitenciario” di e pais. Dialuna pasa Nicolas Maduro a anuncia e creacion di un comision presidi pa Cabello, pa haci e investigacion den un lapso di 60 dia. Como vice-presidente di e comision el a nombra su esposa, Cilia Flores y como secretario ehecutivo e magistrada Lourdes Suarez Anderson.
E mandatario a haci e nombramento despues di señala cu na Venezuela “tin falta di construccion di un revolucion profundo y acelera di e sistema di husticia nacional”.
E comision, segun Maduro, mester soluciona dentro di 60 dia e exceso di preso den e centronan di detencion preventivo y garantiza e paso di e presonan pa centronan penal. Regimen di Maduro ta poniendo atencion riba centronan penitenciario desde mas di un luna.
Segun un decreto di 12 di mei ultimo den Gaceta Oficial a establece cu e autoridadnan di Direccion di Contrainteligencia Militar (Dgcim) y Servicio Bolivariano di Inteligencia Nacional (Sebin) mester “transferi pa ministerio di Servicio Penitenciario e ehercicio di e funcionnan di custodia di persona priva di libertad, den plazo di trinta dia”.
E situacion a ocasiona rechazo di oposicion, ya cu nan ta señala cu esey ta implica e traslado di presonan politico pa prisonnan ordinario.
