Huez: Duna informacion personal na partido ta viola Tratado; Pero derecho di privacidad no ta absoluto

Den e veredicto di huez Soffers duna ayera, diarazon 23 di juni, den e caso entabla pa partido AVP contra ministro di Asunto General, encuanto entrega of no di copia di e registro di votador, e ta constata cu e registro ta contene fam, nombernan, lugar di nacemento, fecha di nacemento, tambe adres manera nan ta den registro di poblacion.

Segun hurisprudencia fiho di Corte Europeo pa Derecho Humano, e derecho di bida priva y di famia manera intenciona den articulo 8, inciso dos di e Convenio Europeo di Derecho Humano (EVRM na Hulandes) ta abarca tambe e derecho riba proteccion di datonan personal. Dunando un partido politico un copia di e registro di votador ta un violacion di articulo 8, inciso uno, di EVRM.

Sin embargo, despues huez ta constata cu e derecho riba privacidad aki no ta un derecho absoluto. A base di articulo 8, inciso dos, por hustifica un violacion di e derecho aki, cu e condicion cu esaki mester ta regla pa ley, ta sirbi un meta legitimo y ta necesario den un sociedad democratico.

Ta constata tambe cu e suministro di e copia di e registro tin su fundamento den e ley di Eleccion (Kiesverordening), den articulo 10, inciso dos. Esey ta implica cu e violacion di e ambito personal ta regla den un ley manera ta intenciona den articulo 8, inciso dos di EVRM.

Tambe ta exigi cu e violacion di articulo 8, inciso uno di EVRM ta sirbi un meta legitimo, es decir ta na interes di seguridad nacional, seguridad publico o bienestar economico di e pais, e prevencion di desorden y hechonan castigable, proteccion di salud o di moralidad o pa proteccion di derecho y libertad di otronan. Pasobra segun e huez, articulo 10, inciso dos, ta propone garantiza un proceso electoral honesto y transparente, e stipulacion aki segun e huicio provisional di e huez ta sirbi un meta legitimo manera intenciona den articulo 8, inciso uno di EVRM.

Sin embargo, huez ta considera cu pa huzga si e infraccion riba articulo 8, inciso uno di EVRM ta necesario den un sociedad democratico, mester evalua si e legislador a haya un balance razonable entre e interes di e individuo y e meta cu e legislador kier logra cu e ley. Un medida ta necesario si tin un necesidad social imperativo, cu por logra cu e medida y cu e medida ta proporcional cu e meta. E margen pa huzga esaki ta bira mas chikito segun cu e informacion cu ta bay duna ta mas sensitivo. Esaki ta conduci na e decision di huez cu no ta posible pa duna e partido demandante tur informacion cu e ley ta contempla, ya huzga cu solamente e nombernan y lugar di votacion lo ser suministra.