(AP) – E gobierno na Merca ta aumentando nan esfuerso pa logra motiva mas Mericano hoben pa vacuna contra COVID-19, mirando cu e Cas Blanco ta admiti cu nan no lo logra 2 di nan metanan pa cu e vacunacion.

Esaki ta trece hopi preocupacion mirando cu e variante Delta ta garando forsa, y ta pone e pais den peliger di un brote den e lunanan binidero.

E variante Delta, cual a ser identifica prome na India, den e dos ultimo simannan ta representando casi mas cu 20% di e infeccionnan di coronavirus den Merca, e Centers For Disease Control and Prevention (CDC) a reporta diamars. Esaki ta dobel di loke e tabata ora cu CDC a reporta ultimo tocante e variante Delta.

“E variante aki Delta, actualmente ta e peligro mas grandi den Merca su intento di elimina COVID-19” Dr. Anthony Fauci, e nacion su miho experto den enfermedadnan contagioso a declara durante un rueda di prensa na e cas blanco tocante e virus. “E bon noticia ta, cu e vacunanan actual ta efectivo contra e variante Delta tambe” Fauci ta agrega.

Dr. Fauci a agrega “Nos tin e material pa por gana, ban usa nan y combati e brote”

Durante e rueda di prensa aki, e cas blanco tambe a admiti cu e President Joe Biden no lo por logra su meta di vacuna 70% di tur Mericano adulto cu por lo menos un dosis di e vacuna prome cu e dia di independencia. Sinembargo, toch el a purba di pinta un imagen optimista poniendo enfasis ariba e hecho cu e nacion a surpasa e porcentahe aki pa cu e personanan di edad 30 bay ariba, y ta premira cu lo yega e porcentahe aki pa personanan di 27 aña bay ariba prome cu e dia di independencia, cual ta dia 4 juli.

Tambe Biden ta premira di no logra un otro meta, e vacunacion completo di por lo menos 165 miyon Mericano adulto prome cu dia 4 di juli. Coordinador di COVID-19 di e cas blanco Jeff Zients a proyecta cu e lo tuma algun siman mas pa por yega e cifra aki. Dialuna pasa, Merca a surpasa un cantidad di 150 miyon Mericano vacuna completamente.

Secretario di prensa di cas blanco Jen Psaki a rechasa e idea cu e hecho di no a logra e dos metanan aki prome cu dia 4 di juli ta representa un fracaso pa e administracion, declarando na e reporteronan “nos no ta wak e cosnan for di e punto di bista cu cosnan a bay malo”

Toch oficialnan di administracion a bisa cu nan no aumenta nan enfoke y pone esaki riba e vacunacion di e Mericanonan mas hoben, specificamente entre 18 pa 26 aña di edad, kendenan aparentemente ta e personanan cu mas duda tin tocante e vacuna, y ta mustra menos dispuesto di tuma e vacuna ora cu e bira disponibel pa nan.