Dialuna ultimo, FADA hunto cu Warda nos Costa, Cuerpo di Polis di Aruba y Aduana, a haci un conferencia di prensa pa trece dilanti algun puntonan tocante e trabou cu nan ta haci pa evita traficacion y uso di droga.

Manera a keda conoci den un otro edicion di Bon Dia Aruba, 26 di juni ta Dia Internacional contra abuso di Droga y tambe Traficacion ilicito, mirando cu e situacion rond di Aruba pa loke ta trata uso di alcohol, arma y droga ta birando un problema serio pa comunidad nan a para keto pa duna e atencion debi na e fecha aki.

Rubiella Toppenberg trahado preventivo di FADA a comenta cu mundialmente, e fecha aki ta wordo celebra pa lanta conscientisacion y e aña aki Nacionnan Uni tin e tema di “Share Facts on Drugs, Save Lives” pa asina enfatisa comunidad cu mester wordo informa, hopi biaha hobennan ta cay facilmente den e gara di droga mirando cu nan no ta mucho bon informa riba e topico aki.

Den esaki, Toppenberg a señala cu FADA su trabou preventivo ta bin aden na unda nan ta duna diferente programa, workshop riba e topiconan di adiccion na scolnan y na diferente compania.

Randy Paskel hefe di e punto di sosten di Warda nos Costa a indica cu nan tambe a wordo invita pa duna un splicacion tocante nan trabou pa loke ta trata combatimento di traficacion di droga, Paskel a expresa cu nan tin un tarea conhuntamente cu diferente departamento como Cuerpo di Polis di Aruba y Aduana, departamentonan primordial cu ta combati e traficacion di droga.

E tarea specifico di Warda Nos Costa ta cu nan tin diferente unidadnan pa bay rima lama, tambe tin avionnan, helicopter, Metal Shark y otro cu ta patruya y sostene e lucha contra traficacion di droga, Paskel a expresa cu nan tin un personal cu a haya un bon training riba e tereno di intercepta riba lama.

Cu ayudo di nan unidadnan den laira, Paskel a informa cu nan detencion riba lama pa deteccionnan cu nan ta considera como dudoso no ta solamente di paisnan bisiña so, tambe traficacion di droga ta wordo haci den direccion di Aruba y pa esaki, el a enfatisa cu e ta un practica cu a bin ta cambiando den ultimo añanan na unda hende local tambe ta involucra buscando cosnan ilicito y droga.

“E parti ey ta un tarea hopi dificil, mi ta kere cu e tarea aki no ta solamente kustwacht e departamento mester takel y nos ta haci’e den conhunto cu nos partner dienstnan y cu tin caminda pa drecha cu ta e parti di samenwerking, pa asina mehora y combati e parti fastioso aki cu tin full mundo den su gara” Paskel a menciona.

Tambe, Paskel a trece dilanti cu e parti di informacion di comunidad tambe necesario, pa motibo cu e departamentonan por traha hunto cu otro pero nan ta keda depende riba informacion cu tin den comunidad mes, na momento cu comunidad por ofrece informacion riba posibel transportacion ilicito di droga, mester haci esey conoci na tiplijn di Cuerpo Policial of Warda Nos Costa cu ta 913 pa haci e pais un tiki mas sigur.

Paskel a duna di conoce cu diariamente nan ta controla cu nan avionnan den laira y nan radarnan tambe ta draai pa nan purba di detecta cualkier movecion cu tin straño.

Lito Lacle vocero di Cuerpo di Polis a bisa cu mientras mas e departamentonan ta comparti informacion cu otro ta importante pa conhuntamente nan por intercepta, investiga y detene hende, nan tambe ta un organisacion cu ta depende hopi di informacion di comunidad, asina mes el a señala cu nan tin diferente departamento cu ta combati droga.

Lacle a comenta cu aworaki nan tin Unicorn Organizer en Criminaliteit cu tin di haber cu grensoverschrijdende criminaliteit, otro ekipo cu tin un par di luna operando pero cu segun Lacle ta specialmente riba straatverkoop cu tin un impacto mas directo riba e pueblo di Aruba, den esaki el a sigura cu nan a drenta den diferente cas y diferente detencion a tuma luga, diferente castigo di prizon a cay tambe den caso aki.

Lacle a conta cu asina tur conhuntamente ta combati esaki pa nada no drenta Aruba cu ta ilicito y esey ta banda di Warda Nos Costa, nan como Cuerpo di Polis ora cu tin algo nan tarea como polis ta pa Ministerio Publico investiga esey.

Tambe el a enfatisa cu Polis no ta dicidi si un investigacion penal ta cuminsa si of no, nan ta zorg pa tin suficiente documentacion pa un fiscal dicidi si lo cuminsa un investigacion penal.

Kathleen Faro management assistent na Departamento di Aduana di Aruba a declara cu nan departamento ta e autoridad aduanero di Aruba cu ta supervisa importacion, exportacion y tambe transito di mercadeo di mercancia.

Ademas di esey, el a conta cu nan ta impone y recauda e derechonan di importacion y impuestonan special, hunto cu esey Aduana tambe ta responsabel pa cumplimento di e normanan riba tereno di siguridad, economia y medio ambiente.

Denice Kelly di seccion Aduana Recherche a bisa cu nan ta traha hunto cu 8 cacho na unda nan ta yuda di duna informacion na scolnan, aparte di esey nan ta na aeropuerto, na waf, aero cargo, postkantoor haciendo diferente otro trabounan.

“Nos ta wak cu hopi droga ta sali for di Aruba y tur hende ta wak cu no ta mucho, pero a nos si ta wak diariamente den tas cu ta sali for di akinan”, el a sigura.

Pa finalisa, nan a trece dilanti cu e problema na Aruba tocante esaki ta serio y nan mester traha riba dje, specialmente den area di prevencion cu nan ta espera cu esey por duna fruto den añanan venidero mirando cu nan ta enfoca hopi riba hobennan.