Diahuebs mainta, Stichting Monumenten Fonds a organisa un conferencia di prensa na caya Steenweg edificio di Ex-Botica Aruba pa celebra 25 aña di e fundacion y ademas duna un gradicimento na esunnan cu a duna su apoyo den añanan aki cu e obhetivo di preservacion.
Anne Witsenburg director di e fundacion a splica cu 25 aña pasa e fundacion a wordo a lanta despues di Monumenten Raad y Monumenten Bureau cu tambe nan ta cumpliendo 25 aña di existencia.
El expresa cu nan hunto ta conforma e sistema di cuido di monumentonan na Aruba, el a bisa tambe cu nan exito no ta pa via di nan trabou so sino cu nan ta un network organization na unda nan tin un ekipo cu semper ta coopera cu partnernan, gobierno, fundacionnan cultural, contratistanan, sector turistico, banconan, scolnan, arkitectonan, hunto cu otro islanan di reino, Hulanda y hopi mas.
Door di crisis nan no por a celebra nan 25 aña manera nan tabata kier segun loke Witsenburg a informa, pero nan lo celebra di un manera mas simpel, e ultimo 25 aña nan a bira doño di 13 monumento, edificionan monumental y algun obhetonan, 12 monumento a wordo restaura y den e momentonan aki nan ta preparando e conservacion di e tanki di awa ubica na Rancho como tambe e restauracion di Cas Tan Tin na Pos Abou.
Di loke ta trata e restauracion di Botica Aruba, Witsenburg a comenta cu ta kedando casi cla y pa cada un di nan monumentonan nan tin un organisacion cu ta usa e monumentonan y e fundacion ta hopi gradici pa esey, pa motibo cu e huur cu nan ta paga ta yuda nan cu proyectonan nobo y restauracionnan nobo.
Pa ta doño di varios monumento, esey ta implica un responsabilidad tambe manera Witsenburg a sigura, Monumenten Fonds ta inverti hopi den mantencion pa nan edificionan keda bon y pa nan usuriarionan por traha, biba y ricibi bishitantenan den e monumentonan.
“Nos monumentonan tin nan balor, loke nan ta representa ta un tempo den nos historia” Witsenburg a bisa y tambe cu nan herencia ta conecta na e barionan, e pueblo y tradicionnan.
Asina mes, el a señala cu nan semper ta trahando riba e conscientisacion y educacion pa asina siña mas y mas residentenan y bishitantenan di Aruba su cultura.
E aña aki riba dia 25 di tur luna nan ta presenta un video riba social media cu ta pone diferente aspecto riba nan logronan, Witsenburg a duna di conoce cu e prome mita di nan existencia nan a ricibi subsidio di pais Aruba cu a yuda nan hopi pa cuminsa y crece nan fundacion.
E ultimo 12 aña, Monumenten Fonds no a ricibi e subsidio esey mas y sinembargo nan a sigui maneha e monumentonan di pais Aruba na unda nan a logra di bira un fundacion independiente y stabiel financieramente, loke ta yuda nan den nan buskeda di fondonan pa crea mas proyectonan.
Banda di esey, Witsenburg a manifesta cu den proximo tempo nan lo enfoca mas riba e yudansa di mas hende y organisacionnan priva cu nan proyectonan y tambe nan ta espera cu Gobierno di Aruba lo cuminsa proteha monumentonan priva pa asina stimula mas doñonan pa conserva e historia.
Tambe, el a duna informacion tocante e dies paso cu por haci pa yega na ‘Bo propio cas historico’ cu ta trata di e proceso cu un persona por haci pa cumpra of restaura un cas di cunucu, pa esunnan interesa por bishita e Facebook Page di Stichting Monumenten Fonds Aruba.
