RvA: Mester mas claridad entre COHO y CAft; Supervision financiero reforza por causa problema

Den su conseho riba e ley di Reino pa cu e organismo di supervision COHO, Conseho Consultivo di Aruba (Raad van Advies, RvA) ta constata cu mester di mas claridad entre e tarea y facultadnan di e dos organismonan di control y supervision cu mester oprera banda di otro.

CAft ta keda e organismo encarga cu supervision financiero general, segun e papel cu e tabatin caba bao di e ley di Aruba, cu lo keda reemplaza pa e ley di Reino (RAft). Pero den e proyecto di ley di COHO ta bisa (articulo 4, inciso 1, sub d) cu un di e tareanan di COHO ta institui “verscherpt toezicht”. Si COHO ta di opinion cu (gobierno di) Aruba ta haci insuficiente esfuerzo pa cumpli cu su obligacionnan, COHO por impone supervision financiero, cu lo ta den man di CAft, cu ta encarga caba cu supervision financiero general, bao di su ley (RAft).

E supervision reforza aki lo tin como consecuencia cu por haci un gasto solamente si CAft ta haya cu esaki no ta en pugna cu derecho o cu interes general financiero. Si Aruba haci esaki sin cu tin aprobacion di CAft anto COHO por suspende e ayudo, duna den cuadro di e tareanan di COHO, parcial o completamente.

Sin embargo, RvA ta haya cu e facultad aki pa impone supervision reforza no ta cuadra cu e meta di e proyecto di ley di COHO, ya cu e intencion ta pa hunto cu COHO implementa reforma di caracter administrativo den gobernacion, realiza finanzas publico sostenible y reforza resiliencia di economia di Aruba.

E supervision riba ehecucion di e proyecto, programa y medidanan acorda y hunto cu esey e poder pa suspende e financiamento di e proyecto y programanan ey ta den linea cu e tarea di supervision, pero un supervision cu ta haya tambe e facultad pa huzga riba tur gasto di gobierno di Aruba, ta bay demasiado leu, RvA ta argumenta.

Den e ley di COHO ta regla ademas cu COHO por impone supervision financiero reforza si no ta cumpli cu e obligacionnan financiero cu Aruba tin bao di e RAft. E supervision ey tambe ta cay pa CAft, un organismo institui pa esey, cu ta consisti di persona cu ta dispone di e conocimento y habilidadnan necesario y cu tin experiencia den supervision financiero. No ta claro por lo tanto pa RvA pakico COHO tambe mester ta encarga cu e supervision riba e cumplimento di e obligacionnan financiero cu ya ta (bay) ta regla caba bao di e RAft.

Ademas ya ta inclui den e RAft e posibilidad pa determina cu no por haci compromiso financiero promer cu CAft (art. 21 RAft) bay di acuerdo cu esey y COHO a base di articulo 24 di su ley tin e potestad pa suspende su apoyo financiero parcial o completamente.

Finalmente ta existi e posibilidad di bay den apelacion cerca Corona, a base di e ley RAft contra tur decision di Conseho di Ministro di Reino, riba un conseho di CAft, pa duna un ‘aanwijzing’. Den e caso di e ley di COHO tin solamente un posibilidad pa apela contra e decision pa institui supervision reforza. Contra un decision por ehemplo di COHO pa suspende e ayudo parcial o enteramente no tin apelacion cerca Corona ni ningun otro forma di apelacion. RvA ta haya por lo tanto cu e potestad duna na COHO a base di articulo 24 pa suspende e ayudo, por ser considera suficientemente efectivo pa percura cu Aruba ta cumpli cu e ley aki y e acuerdonan haci a base di esaki.

RvA ta haya cu ta mas di acuerdo cu e metanan y for di punto di vista di sistematica di ley cu e tareanan relaciona cu supervision financiero ta haya forma completamente dentro di e RAft (y no ley di COHO; red.) y cu ta haya implementacion despues di toma di decision den Conseho di Ministro di Reino.

Te aki e parti aki di nos relato riba e proyecto di ley di COHO, segun conseho di Raad van Advies. Den nos proximo edicion mas atencion pa otro aspecto.