Ayera den oranan di atardi, director di DOW Marlon Croes a ofrece un conferencia di prensa pa medionan di comunicacion y asina trece informacion y algun clarificacion tocante incinerator chikito na Parkietenbos, cu proximamente lo ta operando na Aruba.

Croes a trece dilanti cu nan a tuma nota den ultimo simannan cu tin diferente articulo cu a sali den medionan di comunicacion na unda ta papia di diferente tipo di informacion y cu segun el a enfatisa, esey no ta cuadra y no ta corecto.

Pa e motibo ey, DOW a dicidi bin dilanti pa comunica con e tema di incinerator ta hinca den otro y con nan a bay asina leu, el a splica cu na luna di juni 2020 DOW a tuma over e proceso di incinerator for di Serlimar, pa motibo cu Serlimar na e momento ey tabata hinca den un situacion financiero dificil y e ora ey no por a cumpli cu e contract cu nan tabatin cu Caribbean Trucking Company (CTC).

“Si nos no a tuma e incinerator over, e lo a bira inversion morto, par di miyon para cu no ta den uso”, Croes a sigura.

Pa nan como DOW tabata interesante pa tuma esaki over pa e simpel motibo cu nan ta produci ‘slip’ pa nan plantanan di purificacion y incinerator ta un manera hopi mas limpi pa soluciona e problema di slip cu nan tin cu ta wordo produci.

Banda di esey, nan ta bay usel’e pa ‘medical waste’ y cadavernan di bestia, tur e componente ey di medical waste, slip y cadavernan di bestia actualmente ta wordo kima na un area habri, pafo cu ta bay den aire.

Aparte di esey, Croes a menciona cu nan a tuma over tambe e contract cu Serlimar tabatin cu CTC pa cu e dryer, como DOW y gobierno el a enfatisa cu nan a inverti un suma substancial pa nan por finalisa e instalacion di sprinklerinstallatie e sistema di monitoreo continuo di imagen, sistema di alarma y tur otro rekisito cu tin mester pa nan por cuminsa opera e incinerator aki.

Pa nan por operel’e nan a tuma e sistema den nan behuur pero nan a outsource e operacion di dje na CTC, el a declara cu CTC ta e supplier y representante di ambiente di Inglaterra y fabricante di incinerator aki, ademas cu e ta unico compania na Aruba cu ta certifica na e momentonan aki pa por handle y opera e incinerator.

Tambe, Croes a bisa cu nan a aplica pa un permiso pa e periodo cu nan lo tum’e over den proceso eynan a haya un kort geding contra di pais Aruba na unda e sentencia a bin y hues a bisa cu gobierno pa por opera incinerator tin cu cumpli cu cierto rekisitonan, por ehemplo pone un bandera ora ta oper’e, pone un indicador pa wak den ki direccion e biento ta bin, pa motibo cu si e biento ta bin den direccion pa tera tin cu stop e operacion, y si biento ta bay lama por continua cu e operacion.

Asina mes, el a expresa cu DOW a haci mas inversion pa nan por cumpli cu tur e puntonan y condicionnan cu a wordo buta den e sentencia cu nan a haya, den proceso nan a haya e permiso dia 23 di december 2020, loke ta nifica cu nan a cumpli cu tur rekisito na e momento ey pa por start e incinerator, segun Croes a trece dilanti.

Tocante e sumanan cu ta wordo menciona den medionan di comunicacion, el a sigura cu nan lo tin cu paga na CTC e cifra di 100.000 AWG pa luna, “ta un cifra hopi mas abou di loke ta wordo poni den medionan di prensa”, el a bisa y tambe a specifica cu dos presupuesto ta calcula pa esey e ora cu nan lo bay pa e operacion aki, nan tin hasta un spaar cu ta bay sosode den operacion compara cu e sistema anterior.

El a sigura cu tanto DOW y gobierno a cumpli cu tur rekisito pa asina cuminsa traha cu incinerator, nan tambe tin cu haci un ‘side effects of steps’, cu ta un test cu ta wordo haci na tur ekipo industrial cu ta wordo instala y prome cu lo drenta na servicio e tin cu cumpli cu tur rekisito cu a wordo solicita.

Ademas, den e rekisitonan cu corte a pidi no a bisa cu nan tin cu move e incinerator na otro luga, den ROP y ROPV den concepto cu tin e area aki ta indica como area industrial di maneho di desperdicio.

Asina mes, Croes a manifesta cu e caso aki a tuma luga na februari y for di eynan hues a duna tres luna na gobierno, tambe hues a sigura cu un problema di 60 aña den caso aki di dump Parkitienbos, no por wordo soluciona den tres luna.

Tambe Serlimar a cera un acuerdo cu Ecogas unda cu 80% di e desperdicionan ta wordo hiba na Ecogas y na e momento cu nan ta bay cu e proyecto di incinerator cu slip, medical waste y cadavernan di bestia nan ta agrega 13% mas kita for di landfill y ta wordo kima di un manera sostenibel

“Akinan bo ta mira cu gobierno ta trahando conscientemente pa reduci e cantidad di sushi cu ta yega dump” Croes a declara.

E sistema cu nan a instala pa cu incinerator manera Croes a menciona, ta un sistema automatico digital, cu DVG y DNM por mira cu nan ta cumpli cu standard.