For di ayera 17 di juni, Gobierno di Sint Eustatius a clasifica Aruba como pais di riesgo halto, segun loke a wordo publica riba e Facebook page ‘Gobernment of Sint Eustatius’.
E comunicado ta indica cu for di ayera Aruba ta keda como un pais di riesgo halto pa loke ta trata Covid-19, nan a indica cu e variante Gamma esun mas contagioso di Covid-19 ta na Aruba.
Pa e motibo aki, tur persona cu lo yega na Sint Eustatius for di Aruba mester bay den cuarentena, personanan vacuna tambe mester bay den cuarentena pa un periodo di cinco dia y pa esunnan cu no ta wordo vacuna contra Covid-19 ta aplica un periodo di 10 dia.
Ta importante pa destaca cu Bon Dia Aruba a tuma contacto cu Departamento di Salud Publico, Jurette Croes relacionista publico di e departamento a menciona cu e variante Gamma ta esun di Brasil y na Aruba e tin basta lunanan caba.
Organisacion Mundial di Salud (OMS) a renombra e variantenan for di comienso di juni y a pone pa nan nomber di letternan Griego, por ehemplo, esun di Reino Uni awor ta denomina como variante Alfa, esun di Sur Africa Beta y esun Hindu como Delta.
