(AP) — Un grupo di legisladornan a trece dilanti u pakete legislativo amplio cu lo por hala aden e poder di mercado di companianan Big Tech, y forsa Facebook, Google, Amazon of Apple pa kibra nan plataformanan dominante for di nan otro linea comercial.
E propuestanan bipartisano ta e culminacion di un investigacion di 15 luna di e subcomite anti-competencia di Comite Hudiciario di Congreso, lidera pa representante democrata David Cicilline di Rhode Island. A conclui cu e cuatro gigante tecnologico a abusa di nan poder di mercado door di cobra sumanan excesivo, impone terminonan di contract fuerte, y extrae data valioso for di individuo- y negoshinan cu ta depende di nan.
“Na e momento aki, monopolionan tecnologico sin regulacion tin demasiado poder riba nos economia”, Cicilline a bisa den un declaracion. “Nan ta den un posicion unico di scoge ganador- y perdedornan, destrui negoshinan chikito, aumenta prijs riba consumidornan y laga hende sin trabao. Nos agenda lo nivela e campo y sigura cu e monopolionan tecnologico di mas rico y poderoso hunga cu e mesun reglanan cu resto di nos.”
E legislacion proponi ta enfoca riba e structura di e companianan y lo por kibra nan, un stap radicacl pa Congreso tuma contra un industria poderoso. E gigantenan tecnologico pa decadas a disfruta di legislacion suave y status di strea na Washington, pero a bin cay bao scrutinio cada bes mas intenso tocante asuntonan di competencia, privacidad di consumidor y discurso di odio.
Durante su campaña, presidente Joe Biden a bisa cu kibra companianan di Big Tech lo mester wordo considera, maske e no a papia riba e asunto como presidente. Si stapnan asina bira obligatorio, nan por trece e cambionan di mas grandi cu e industria a mira desde e caso historico di gobierno federal contra Microsoft casi 20 aña pasa.
Representante Ken Buck di Colorado, e republicano senior den e panel anticompetencia, ta pushando e legislacion cu Cicilline. Cantidad di legisladornan republicano ta denuncia e dominio di mercado di Big Tech, pero no ta sostene un cambio ‘wholesale’ di leynan anticompetencia.
Avansa e legislacion den Congreso por ta algo dificil. Democratanan ta controla e Congreos pero lo tin mester di gana votonan Republicano den Senado, cu ta dividi 50-50 cu e margen di un voto di e democratanan dependiendo riba vicepresidente Kalama Harris pa kibra e empate.
E propuestanan tambe lo prohibi companianan di Big Tech di faborece nan propio producto y servicionan riba competidornan riba nan plataformanan. Un investigacion anticompetencia di Congreso a descubri, por ehempel, cu Google tin poder di monopolio den mercado pa buskeda, mientras Facebook tin poder di monopolio den mercado di rednan social. E subcomite a bisa cu Amazon y Apple tin ‘poder di mercado significante y duradero’ den mercado di retail na Merca, y den sistemanan operacional mobil y tienda di app mobil, respectivamente.
E legislacion proponi tambe lo hacie mas dificil pa e companianan di tecnologia gigante cumpra competidornan den fusionnan, loke nan a completa a gran escala den añanan recien. Y ta pidi Congreso pa reforsa e podernan di cumplimento di reguladornan anticompetencia, manera e Federal Trade Comission (FTC).
E cuatro compania en cuestion a rechasa e acusacionnan di e legisladornan di abusa nan posicion dominante den mercado, y a insisti cu intervencion inadecua den e mercado mediante legislacion lo daña negoshinan chikito y consumidornan.
Un grupo di industria tecnologico, e Computer & Communications Industry Association, a bisa diabierna ultimo cu e legislacion tin meta di ‘regula un grupo selecta di proveedornan di servicio digital Mericano’. “E regulacionnan proponi aki ta representa un cambio for di e principionan basa riba mercado cu a caracterisa politica economico di Merca”, e grupo a bisa. “Nan lo tin un impacto severo riba liderazgo economico Mericano y lo reduci habilidad di consumidornan di disfruta servicionan digital gratis.”
