FTA ta un di e sindicatonan cu ta participa den USA (Union Sindical Aruba), caminda na nivel di e union sindical aki tambe mester bin “situacion” pa loke nos pueblo ta pasando aden, segun presidente di FTA sr. Hubert Dirksz.
Mirando cu gobierno mester sanea su situacion financiero y cu lo bin mas medida, FTA no ta kere cu e biaha aki nan lo bay sinta cu Gobierno den seno di Dialogo Social, manera den pasado nan a haci esey, ora cu a bin entre otro cu cambio den ley di fondo di pensioen (AOV).
Dialogo Social
E sindicalista Dirksz a bisa cu a pesar di medida cu ta wordo papia manera introduccion di impuesto riba importacion esta ABB, e ta spera cu luna di december no lo ta uno turbulento. Pero el a laga sa cu FTA su congreso y nan miembronan ta keda na haltura di e desaroyo aki. El a declara cu si mester sinta cu gobierno nan ta dispuesto pa haci esey, pero FTA sa cu di parti di gobierno tur “situacion ta wordo hinca den e bachi di Dialogo Social”.
Presidente di FTA a bisa bon cla cu nan congreso a dicidi cu FTA no lo participa den niun Dialogo Social mas. E decision aki –segun sr. Dirksz- ta debi cu Dialogo Social a wordo “uza”. Ya cu na momento cu sindicatonan, specificamente FTA, a aporta pa solucionnan pa pais Aruba tabata bon. El a agrega cu FTA a carga consecuencia pa e decision aki y te hasta haci sacrificio. Pero na momento cu pa ehempel nan a bisa Gobierno pa no hisa edad di pensioen di 60 pa 65 aña, Gobierno a dicidi di bay Parlamento y aumenta edad di pensioen.
“Esey nos no ta di acuerdo cun’e. Y nos congreso a tuma e decision ey cu nos no lo participa mas den Dialogo Social”, el a bisa.
Relacion cu gobierno
E decision aki –segun presidente di FTA- kiermen cu lo haci dificil e relacion cu Gobierno pa atende di e manera cu “nan kier atende”. E ta considera e situacion aki como delicado y nan congreso cu a termina su reunion extra ordinario diabierna ultimo, mester a tuma un decision riba e posicion cu Gobierno. “Di parti di directiva di FTA nan lo evalua e decision adopta pa nan delegadonan .
Aunke e no ta vocero di USA, pero presidente di FTA ta kere cu e demas sindicatonan cu ta forma parti di e union aki tambe lo mester duna nan opinion ariba esaki.
